கையில் விஷத்துடன் முதலமைச்சரை சந்திக்க முயன்ற பெண்ணால் பரபரப்பு

by oviya Thu Oct 08, 2015 2:26 pm

ஆந்திராவில் பெண் ஒருவர் தனது அபகரிக்கப்பட்ட வீட்டை மீட்டு தரக்கோரி முதலமைச்சரை சந்திக்க விஷ பாட்டிலுடன் சென்ற சம்பவம் பெரும் பரபரப்பை ஏற்படுத்தியுள்ளது.
ஆந்திர மாநிலம் குண்டூர் மாவட்டம் சத்தனபள்ளி பகுதியை சேர்ந்த விஜயா (30) என்ற பெண்மணிக்கு சொந்தமாக 1½ சென்ட் நிலத்தில் வீடு உள்ளது.

இந்த வீட்டுக்கு பட்டா இல்லாததால் பட்டாவாங்கி தருமாறு தெலுங்கு தேசம் கட்சி பிரமுகர் ஒருவரிடம் கேட்ட போது, அவர் பட்டா வாங்கி தருவதாக கூறினார்.

ஆனால் அவர் தனது பெயரில் அந்த வீட்டுக்கு பட்டா வாங்கிக் கொண்டு, விஜயாவை வீட்டை காலி செய்யுமாறு மிரட்டியுள்ளார்.

இதுபற்றி விஜயா அதிகாரிகளிடம் புகார் செய்தும் எந்த நடவடிக்கை எடுக்கவில்லை.

இதையடுத்து முதலமைச்சர் சந்திரபாபு நாயுடுவை சந்திக்க முடிவு செய்த விஜயா விஷ பாட்டிலுடன் சென்றுள்ளார்.

அப்போது சோதனை நடத்திய அதிகாரிகள் அவரிடம் இருந்து விஷ பாட்டிலை பறிமுதல் செய்துள்ளனர்.

மேலும் விஜயா கூறுகையில், எனது வீட்டை மீட்டு தராவிட்டால் விஷம் குடித்து தற்கொலை செய்யலாம் என்று விஷ பாட்டிலுடன் வந்ததாக கூறியுள்ளார்.