பெண் என்ஜினீயர் கொலை வழக்கில் திடீர் திருப்பம்: அவுஸ்திரேலியா பொலிசார் இந்தியா வருகை

அவுஸ்திரேலியாவில் கத்தியால் குத்தி கொல்லப்பட்ட இந்திய பெண் என்ஜினீயர் கொலை வழக்கு தொடர்பாக புதிய சி.சி.டி.வி. புகைப்படங்களை பொலிசார் வெளியிட்டுள்ளனர்.
பெங்களூருவை சேர்ந்த பிரபா அருண் குமார் (41) கடந்த மார்ச் மாதம் 7ம் திகதி வேலை முடிந்து வெஸ்ட் மெட்டில் உள்ள வீட்டுக்கு திரும்பிய போது மர்ம நபரால் கத்தியால் குத்தி கொலை செய்யப்பட்டார்.

இதுதொடர்பாக சிட்னி பொலிசார் விசாரணை நடத்தி வரும் நிலையில் குற்றவாளி யார் என்று இதுவரை அடையாளம் காணப்படவில்லை.

இந்நிலையில் அந்த கொலை தொடர்பாக புதிய சி.சி.டி.வி. புகைப்படங்களை அவுஸ்திரேலிய பொலிஸ் வெளியிட்டுள்ளது.

பிரபா கொலை செய்யப்பட்ட இடத்திற்கு அருகே நடந்து சென்ற நபர் ஒருவரின் புகைப்படம் வெளியிடப்பட்டுள்ளது.

விசாரணை அதிகாரி இதுபற்றி கூறுகையில், சி.சி.டி.வி. பதிவில் இடம்பெற்றுள்ள நபர் யார் என்று, விசாரணை நடத்திவரும் எங்களால் இதுவரையில் அடையாளம் காணமுடியவில்லை என்று தெரிவித்துள்ளார்.

பிரபாவின் உயிரிழப்பு இந்தியாவில் அவருடைய உறவினர்கள் உள்பட அதிகமான மக்களை பாதிப்படைய செய்துள்ளதால் அவர்கள் விசாரணை விரைவில் முடிய நெருக்கடி கொடுத்து வருகின்றனர் என்று விசாரணை அதிகாரி தெரிவித்துள்ளார்.

இந்நிலையில், கொலை வழக்கு தொடர்பாக அமைக்கப்பட்ட சிட்னி சிறப்பு படை காவலர்கள், விசாரணை நடத்த மங்களூர் வருவதாக தகவல் வெளியாகியுள்ளது.