செல்லமாக காதை பிடித்து திருகிய மோடி: வெட்கத்துடன் நெளிந்த சிறுமி

பிரதமர் நரேந்திர மோடி குடியரசு தினத்தையொட்டி வீர தீர செயலுக்கான விருது பெற்ற ஒரு சிறுமியின் காதைப் பிடித்து செல்லமாக திருகிய படம் தற்போது இணையதளத்தில் பரவி வருகிறது.
திரிபுராவைச் சேர்ந்தவர் ரிபா தாஸ்( என்ற சிறுமி தீ விபத்திலிருந்து தனது தம்பியின் உயிரைக் காத்து தீரமாக நடந்து கொண்டார்.

இதற்காக அவருக்கு வீரச் செயலுக்கான விருது கிடைத்துள்ளது. கடந்த ஆண்டு இவரது வீடு தீ விபத்தில் சிக்கியபோது தனது உயிரையும் பொருட்படுத்தாமல் தனது குட்டித் தம்பியை பத்திரமாக மீட்டு வந்து அசத்தினார்.

இதுகுறித்த படத்துடன் பிரதமர் வெளியிட்டுள்ள டிவிட் செய்தியில், ரிபா தாஸ் என்ற எனது இந்த இளம் தோழியின் செயலை விவரிக்க எனக்கு வார்த்தைகளே இல்லை. இவள் தனது தம்பியை மிகப் பெரிய தீ விபத்திலிருந்து துணிச்சலுடன் காப்பாற்றியுள்ளாள் என்று பாராட்டியுள்ளார்.

மேலும், பிரதமர் மோடி இவரது காதைப் பிடித்து செல்லமாக திருகியபடி போஸ் கொடுத்த புகைப்படம் பிரதமரின் இணையதளத்தில் வெளியிடப்பட்டுள்ளது.

பிரதமர் தனக்குப் பின்னால் நின்று கொண்டு தனது காதைப் பிடித்து செல்லமாக திருகியதைப் பார்த்து அந்த சிறுமி வாய் நிறைய சிரிப்புடன் வெட்கத்துடன் நெளிகிறார்.