பள்ளி ஓட்டுனரின் மகள் மாநிலத்தில் 2ம் இடம் பிடித்து சாதனை

by oviya Thu May 21, 2015 1:57 pm

விழுப்புரத்தில் பள்ளி ஓட்டுனரின் மகள் மாநிலத்தில் 2ம் இடம் பிடித்து சாதனை படைத்துள்ளார்.
விழுப்புரம் மாவட்டம் கள்ளக்குறிச்சி ஏ.கே.டி. பள்ளி மாணவி கனிமொழி 498 மதிப்பெண் எடுத்து மாநில அளவில் 2ம் இடம் பெற்றுள்ளார்.

மாணவி கனிமொழி தந்தை கணேசன், கனிமொழி படிக்கும் பள்ளியிலேயே பேருந்து ஓட்டுனராக பணியாற்றி வருகிறார் என்பது குறிப்பிடத்தக்கது.

கனிமொழி நிருபர்களிடம் கூறுகையில், நான் இந்த அளவுக்கு மதிப்பெண் எடுத்து மாநில அளவில் 2ம் இடம் பிடித்திருப்பதற்கு எனது பெற்றோரும் ஆசிரியர்களுமே காரணம்.

நான் தினமும் காலையில் 5 மணிக்கு எழுந்து படிப்பேன். எனது பெற்றோர் நான் நன்றாக படிக்க வேண்டும் என என்னை உற்சாகப்படுத்தினர்.

அதேபோல் பள்ளியிலும் ஆசிரியர்கள் மிகவும் உற்சாகப்படுத்தி உதவிகளை செய்தனர்.

தினமும் மாலை 7 மணி வரை பள்ளியிலேயே தங்க வைத்து படிக்க வைத்தனர்.

நான் ஏழ்மை குடும்பத்தை சேர்ந்தவள், கஷ்டப்பட்டு படித்து இந்த நிலைக்கு வந்துள்ளேன்.

மேலும், 12ம் வகுப்பில், மாநில அளவில் முதலிடம் பிடிக்க வேண்டும் என்பது எனது லட்சியம் என்றும் பின்னர், மருத்துவம் படித்து ஏழை மக்களுக்கு சேவை செய்வேன் எனவும் தெரிவித்துள்ளார்.