தெஹிவளையில் பரபரப்பை ஏற்படுத்திய போலி அரசன்

தெஹிவளையில் அரசனைப் போன்று வேடமணிந்து வேட்பாளரைப் போன்று பேசிக் கொண்டிருந்த நபரொருவரை பொலிஸார் கைது செய்துள்ளனர்.

நேற்று குறித்த நபர் தெஹிவளை மேம்பாலத்தின் கீழ் தற்காலிக மேடையொன்றை அமைத்துக் கொண்டு அதன் மீது அசல் அரசனைப் போல உடையணிந்து பேசிக் கொண்டிருந்துள்ளார்.

பூரண அரச உடை, கிரீடம், சப்பாத்துகள், ஏனைய அணிகலன்களுடன் இடுப்பில் நான்கடி நீளமான இரும்பு வாளொன்றையும் செருகிக்கொண்டு இவர் பேசிக்கொண்டிருந்ததை அங்கிருந்த சிலர் வேடிக்கை பார்த்துக் கொண்டிருந்தனர்.

இதனையடுத்து சம்பவ இடத்திற்கு வந்த பொலிஸார் குறித்த நபரைக் கைது செய்துள்ளனர்.

கைது செய்யப்பட்ட இந்த 42 வயது நபர் கண்டி தியபுபுலு பிரதேசத்தைச் சேர்ந்தவர் எனவும் அவர் ஏதாவது மனநோயால் பீடிக்கப்பட்டிருக்கலாம் என பொலிஸார் சந்தேகம் வெளியிட்டனர்.

இந்த நிலையில், குறித்த நபரை மனநோய் வைத்தியரிடம் பரிசோதனைக்கு உட்படுத்த ஏற்பாடுகள் செய்யப்பட்டுள்ளதாக தெஹிவளை பொலிஸார் தெரிவித்தனர்.