10 வயது சிறுவனை கொடும்குற்றவாளி போல் நடத்திய பொலிசார்: வலுக்கும் எதிர்ப்பு

தெலுங்கானாவில் திருட்டு வழக்கு தொடர்பாக கைதான 10 வயது சிறுவனை பொலிசார் கைவிலங்கிட்டு அழைத்துச் சென்ற சம்பவம் அதிர்ச்சியை ஏற்படுத்தியுள்ளது.
மேடக் மாவட்டத்தில் சில நாட்களுக்கு முன் நடைபெற்ற திருட்டுச் சம்பவம் தொடர்பாக உத்தரப்பிரதேசத்தைச் சேர்ந்த சிறுவனை பொலிசார் கைது செய்தனர்.

பின்னர் அவனை நிஜாமாபாத் மாவட்டத்தில் உள்ள சிறார் சீர்திருத்தப் பள்ளியில் அடைத்து வைத்தனர்.

இந்த வழக்கு தொடர்பாக அந்த சிறுவனை சங்காரெட்டி நீதிமன்றத்தில் நேற்று நடைபெற்ற விசாரணையில் ஆஜர்படுத்த அழைத்து சென்ற பொலிசார் சிறுவனுக்கு கைவிலங்கு மாட்டியிருந்ததை ஊடகவியலாளர்கள், படம் பிடித்து வெளியிட்டனர்.

இந்த காட்சிகளும், புகைப்படங்களும் சமூக வலைத்தளங்களிலும் பரவின.

இந்நிலையில், சமூக ஆர்வலர்கள் இச்சம்பவத்துக்கு கடும் கண்டனம் தெரிவித்துள்ளனர்.

மேலும், குறிப்பிட்ட சில வழக்குகளில் மட்டுமே குற்றவாளிகளுக்கு கைவிலங்கிட்டு அழைத்துச் செல்ல வேண்டும் என்ற உச்ச நீதிமன்ற நெறிமுறைகளுக்கு எதிராக நடந்துள்ளது தொடர்பாக அரசு கடும் நடவடிக்கை எடுக்க வேண்டும் என வலியுறுத்தியுள்ளனர்.