மைத்திரியின் கொள்கைகள் சர்வதேசத்தின் பாராட்டை பெற்றுள்ளன: மகிந்த சமரசிங்க

ஜனாதிபதி மைத்திரிபால சிறிசேனவின் வேலைத்திட்டங்கள் மற்றும் கொள்கைகள் சர்வதேசத்தின் பாராட்டுக்களை பெற்றுள்ளதாக முன்னாள் அமைச்சர் மகிந்த சமரசிங்க தெரிவித்துள்ளார்.
ஸ்ரீலங்கா சுதந்திரக் கட்சியின் தலைமையகத்தில் இன்று நடைபெற்ற ஊடகவியலாளர் சந்திப்பில் அவர் இதனை கூறியுள்ளார்.

அவர் மேலும் தெரிவிக்கையில்,

கடந்த மகிந்த ராஜபக்ச அரசாங்கம் கடும் சீன ஆதரவு கொள்கையை முன்னெடுத்து வந்தது.

தற்போதைய ஜனாதிபதி மைத்திரிபால சிறிசேன இந்த கொள்கைக்கு பதிலாக அனைத்து நாடுகளுடனும் நட்பு மற்றும் நடுநிலையான தொடர்புகளை முன்னெடுத்து வருவதால், அடுத்த மனித உரிமை ஆணைக்குழுவின் மாநாட்டின் போது இலங்கைக்கு பாரிய சாதக நிலைமை உருவாகும்.

கடந்த காலங்களில் மனித உரிமை ஆணைக்குழுவின் மாநாட்டில் இலங்கைக்கு எதிராக தொடர்ந்தும் யோசனைகளை முன்வைத்த அமெரிக்கா உட்பட சகல நாடுகளின் நல்லெண்ணத்தை ஜனாதிபதி பெற்றுள்ளார்.

இதன் காரணமாக மனித உரிமை பிரச்சினை தொடர்பான உள்நாட்டு விசாரணைக்கு கூடிய ஒத்துழைப்புகளை வழங்குவதாக அமெரிக்கா தெரிவித்துள்ளது.

ஜனாதிபதியின் தூரநோக்கமும், நட்பு ரீதியான வெளிநாட்டு கொள்கைகளே இதற்கு காரணம் எனவும் மகிந்த சமரசிங்க குறிப்பிட்டுள்ளார்.