மோடிக்கு பூங்கொத்து அனுப்பி வைத்த நடிகர் ரஜினிகாந்த்

ஒருநாள் பயணமாக சென்னை சென்ற பிரதமர் நரேந்திர மோடிக்கு உற்சாக வரவேற்பு அளிக்கப்பட்டது.
அவர் தன் பயணத்தை நிறைவு செய்த பின்னர் மீண்டும் டெல்லி திரும்ப சென்னை மீனம்பாக்கம் விமான நிலையத்துக்கு மாலை 3 மணி அளவில் வந்தார்.

அப்போது, நடிகர் ரஜினிகாந்த் சார்பில் கொடுத்து அனுப்பப்பட்ட பூங்கொத்தும், கடிதம் ஒன்றும் கொண்டுவரப்பட்டது.

அவை தாமதமாக கொண்டுவரப்பட்டதால் மோடியிடம் சேர்க்க முடியவில்லை என பாஜக நிர்வாகிகள் தெரிவித்தனர்.

இது குறித்து பாஜக மாநில தலைவர் தமிழிசை சௌந்தரராஜன் கூறுகையில், மோடி விமான நிலையத்துக்குள் சென்ற பிறகு, தாமதமாக அவை கொண்டுவரப்பட்டதால் மோடியிடம் சேர்க்க முடியவில்லை.

இருப்பினும் இந்த தகவலை மோடியிடம் கூறியதாகவும், அந்த கடிதத்தை மின்னஞ்சல் மூலமாக அவருக்கு அனுப்பி வைத்ததாகவும் அவர் தெரிவித்துள்ளார்.

மேலும், அந்த கடிதத்தில் "நான் வெளியூரில் இருப்பதால் உங்களைச் சந்திக்க முடியவில்லை. நான் உங்களைச் சந்திக்க விருப்பமாக உள்ளேன்'" என்று நடிகர் ரஜினி எழுதியிருந்தார்.

இதைப் படித்த பிரதமர் நரேந்திர மோடி, "நானும் சந்திக்க விருப்பமாக உள்ளேன். எப்போது டெல்லி வந்தாலும் சந்திக்கலாம்" என்று பதில் தெரிவித்தாக தமிழிசை சௌந்தரராஜன் கூறியுள்ளார்.