கலாம் படித்த பள்ளி மற்றும் கல்லுரியில் பயிலும் மாணவர்கள் அஞ்சலி

ராமேஸ்வரம் மற்றும் திருச்சியில் அப்துல்கலாம் படித்த பள்ளி மற்றும் கல்லூரியில் பயிலும் மாணவர்கள் அவரது படத்தை திறந்து வைத்து மலரஞ்சலி செலுத்தினார்கள்.
ராமேஸ்வரம் வர்த்தகன் தெருவில் முன்னாள் குடியரசுத்லைவர் ஏ.பி.ஜே.அப்துல் கலாம் படித்த ஊராட்சி ஒன்றிய நடுநிலைப்பள்ளி உள்ளது.

அப்துல்கலாமின் மறைவுச் செய்தியை கேட்டதும் அப்பள்ளியில் பயிலும் ஆசிரியர்கள், மாணவ, மாணவியர்கள் அனைவரும் ஒன்று சேர்ந்து பள்ளியின் முன்பாக ஒன்று கூடினார்கள்.

பின்னர் அவரது திருவுருவப்படத்தை திறந்து வைத்து முதலில் மலரஞ்சலி செலுத்தினார்கள்.

இதனைத் தொடர்ந்து மாணவர்கள் ஒவ்வொருவரும் மெழுகுவர்த்தி ஏந்தி முன்னாள் குடியரசுத் தலைவரின் படத்திற்கு அஞ்சலி செலுத்தினார்கள்.



இதேபோல அப்துல்கலாம் படித்த திருச்சி செயின்ட் ஜோசப் கல்லூரியிலும் அவருக்கு அஞ்சலி செலுத்தப்பட்டது.

திருச்சி செயின்ட் ஜோசப் கல்லூரியில், இயற்பியல் பாடப்பிரிவில் தனது கல்லூரி வாழ்க்கையை தொடங்கினார் முன்னாள் குடியரசுத் தலைவர் அப்துல்கலாம்.

இந்நிலையில், அப்துல் கலாமின் மறைவு செய்தி அவர் படித்த கல்லூரியில் சோகத்தை ஏற்படுத்தியுள்ளது.

இன்று காலை அவர் படித்த இயற்பியல் பாடப்பிரிவு வகுப்பறையில் மாணவர்கள், கலாமின் திருவுருவப்படத்துக்கு மாலை அணிவித்து அஞ்சலி செலுத்தினர்.

மேலும் கல்லூரி வளாகத்தில் வைக்கப்பட்டுள்ள கலாம் திருவுருவப்படத்துக்கு பாதிரியார்கள், பேராசிரியர்கள், மாணவர்கள் மலர் தூவி அஞ்சலி செலுத்தினர்.

பின்னர் மாணவர்கள், அப்துல்கலாமின் உருவப்படத்துடன் பேரணியாக சென்றனர். இந்த பேரணி திருச்சி சத்திரம் பேருந்து நிலையத்தில் இருந்து கல்லூரி வரை நடைபெற்றது.

மேலும், தமிழகத்தின் பல்வேறு பகுதிகளில் உள்ள கல்வி நிலையங்களிலும் இன்று அப்துல் கலாமுக்கு அஞ்சலி செலுத்தியுள்ளனர்.