ரணிலின் சலூன் கதவு திறக்கப்பட்டுள்ளது: அமைச்சர் பீ. ஹெரிசன்

மகிந்த ராஜபக்சவின் சலூன் கதவு தானாகவே மூடிக்கொண்டுள்ளதாகவும் அதற்கு பதிலாக ரணில் விக்ரமசிங்கவின் சலூன் கதவு திறந்துள்ளதாகவும் அமைச்சர் பீ. ஹெரிசன் தெரிவித்துள்ளார்.

அனுராதபுரத்தில் இன்று நடைபெற்ற ஊடகவியலாளர் சந்திப்பில் அவர் இதனை கூறியுள்ளார்.

மகிந்த ராஜபக்சவுக்கு தேர்தலில் போட்டியிட வாய்ப்பு வழங்கப்படும் என ஐக்கிய மக்கள் சுதந்திர முன்னணி கூறினாலும் அது உறுதிப்பட தெரிவிக்கப்படாததால், சந்தேகம் நிலவுகிறது.

ஸ்ரீலங்கா சுதந்திரக் கட்சியை சேர்ந்த 20க்கும் மேற்பட்ட முக்கியஸ்தர்கள் ஐக்கிய தேசியக் கட்சியுடன் விரைவில் இணைந்து கொள்ள உள்ளனர்.

எதிர்வரும் பொதுத் தேர்தலில் ஐக்கிய தேசியக் கட்சி நிச்சயம் வெற்றி பெற்று ஸ்ரீலங்கா சுதந்திரக் கட்சி மற்றும் ஏனைய கட்சிகளுடன் இணைந்து தேசிய அரசாங்கம் ஒன்றை அமைக்கும்.

அத்துடன் மகிந்த ராஜபக்ச எமக்கு சவாலானவர் அல்ல. அவர் மக்களால் நிராகரிக்கப்பட்ட தலைவர். அவரால் மீண்டும் ஆட்சிக்கு வர முடியாது எனவும் பீ. ஹெரிசன் குறிப்பிட்டுள்ளார்.