வேளாண் அதிகாரி தற்கொலை வழக்கு: அக்ரி கிருஷ்ணமூர்த்தி உதவியாளரிடம் பொலிசார் ரகசிய விசாரணை

வேளாண் அதிகாரி தற்கொலை வழக்கில் முன்னாள் அமைச்சர் அக்ரி கிருஷ்ணமூர்த்தியின் உதவியாளர் பீரங்கி வெங்கடேசனை சிபிசிஐடி பொலிசார் ரகசிய இடத்தில் வைத்து விசாரித்து வருகின்றனர்.
ஓட்டுநர்கள் பணி நியமன விவகாரத்தில் நெல்லை வேளாண் அதிகாரி முத்துக்குமாரசாமி ரயில் முன்பு பாய்ந்து தற்கொலை செய்து கொண்டார்.

இதையடுத்து இந்த‌ வழக்கை விசாரித்து வரும் சிபிசிஐடி பொலிசார், முன்னாள் வேளாண்துறை அமைச்சர் அக்ரி கிருஷ்ணமூர்த்தி மற்றும் தலைமை பொறியாளர் செந்தில் ஆகியோரை கடந்த ஏப்ரல் 5ம் திக‌தி கைது செய்து பாளையங்கோட்டை மத்திய சிறையில் அடைத்த‌னர்.

இந்தநிலையில் தற்போது இந்த வழக்கில் அக்ரி கிருஷ்ணமூர்த்தியின் உதவியாளர் பீரங்கி வெங்கடேசனை சிபிசிஐடி பொலிசார் கைது செய்து ரகசிய இடத்தில் வைத்து விசாரித்து வருவதாக தகவல்கள் வெளியாகியுள்ளது.

அமைச்சர் சார்பாக நெல்லையில் வேளாண் அதிகாரி முத்துக்குமாரசாமியின் வீட்டுக்கு பலமுறை சென்றுள்ள பீரங்கி வெங்கடேசன் அதிகாரியையும் அவரது மனைவியையும் மிரட்டியது உறுதி செய்யப்பட்டுள்ளதாக தெரிகிறது.

மேலும், முத்துக்குமாரசாமியின் மனைவி இதை சிபிசிஐடி காவல் கண்காணிப்பாளர் அன்புவிடம் வாக்குமூலமாக அளித்துள்ளதால் பீரங்கி வெங்கடேசன் விரைவில் கைது செய்யப்பட்டு சிறையில் அடைக்கப்படலாம் என எதிர்பார்க்கப்படுகிறது.