நான் இங்கு மகிழ்ச்சியாக இருக்கிறேன் : ஐ.எஸ். இயக்கத்தில் சேர்ந்த இந்திய வாலிபர்

மும்பையில் இருந்து ஈராக் சென்று ஐ.எஸ். தீவிரவாத இயக்கத்தில் சேர்ந்த வாலிபர் ஒருவர், தான் அங்கு மகிழ்ச்சியாக இருப்பதாக தெரிவித்துள்ளார்.
மும்பையின் கல்யாண் பகுதியை சேர்ந்த 4 வாலிபர்கள், கடந்த ஆண்டு மே மாதம், சுற்றுலா செல்வதாக வீட்டில் கூறிவிட்டு ஈராக் சென்று ஐ.எஸ். தீவிரவாத இயக்கத்தில் சேர்ந்துவிட்டனர்.

இந்நிலையில் கடந்த ஒரு மாதத்துக்கு முன், அந்த 4 பேரில் ஒருவரான ஷேக் என்ற பொறியாளர், தன் குடும்பத்தினர் மற்றும் நண்பர்களுடன் தொலைபேசி மற்றும் இணையம் மூலம் தொடர்புகொண்டுள்ளார்.

இதையடுத்து தற்போது சிரியாவின் ரக்கா பகுதியில் உள்ள இவரின் கைபேசி எண்ணை தேசிய புலனாய்வு அமைப்பினர் கண்டுபிடித்து அவருடன் பேசியுள்ளனர்.

அப்போது அதிகாரிகளிடம் பேசிய ஷேக், எங்கள் இனத்தை சேர்ந்தவர்களை இந்தியா மரியாதையாக நடத்தவில்லை.

ஆனால், நான் இங்கு மிகவும் மகிழ்ச்சியாக இருக்கிறேன் என்றும் நான் இந்தியாவுக்கு திரும்ப வரப்போவது இல்லை எனவும் தெரிவித்துள்ளார்.

மேலும் அவருடன் சென்ற சஹிம் டாங்கி என்பவர் போரில் இறந்து விட்டதாக கூறப்பட்ட தகவலையும் ஷேக் தற்போது உறுதிப்படுத்தியுள்ளதாக தகவல்கள் வெளியாகியுள்ளது.

இந்த 4 பேரில் ஒருவரான ஆரீப் மஜீத் என்ற நபர், ஐ.எஸ். தீவிரவாதிகள் பெண்களை கட்டாயப்படுத்தி திருமணம் செய்து வைப்பது, கட்டாய உடலுறவு என மிக மோசமாக நடத்துவது போன்ற நடவடிக்கைள் பிடிக்காமல் கடந்த நவம்பரில் இந்தியாவுக்கு திரும்பிவிட்டார் என்பது குறிப்பிடத்தக்கது.