திருமணங்களில் வாடகைக்கு அமர்த்தப்படும் குரங்குகள்: ஆக்ராவில் நடக்கும் வினோதம்

உத்தரப்பிரதேச மாநிலம் ஆக்ராவில், திருமண செலவில் குரங்குகளை வாடகைக்கு அமர்த்துவதும் தற்போது கட்டாயமாகி வரும் வினோதம் நடக்கிறது.
ஆக்ராவில் குரங்குகளின் தொல்லை அதிகம் என்பதால் அதனை எதிர்கொள்வதற்காக திருமண விசேஷங்கள் நடைபெறும் இடங்களில் அவற்றை விரட்டுவதற்காக சாம்பல் நிற லங்கூர் வகை குரங்குகளை திருமண வீட்டார் வாடகைக்கு அமர்த்தும் செயல் நடக்கிறது.

சாம்பல் நிற லங்கூர் குரங்குகளுக்கு மற்ற குரங்குகளைக் கண்டால் பிடிக்காது என்பதால் லங்கூர் குரங்களை வைத்திருக்கும் குரங்காட்டிகளுக்கு திருமண சமயங்களில் நல்ல தேவை உள்ளது.

திருமண வீட்டார் இவர்களை முன்கூட்டியே ரூ.3,000 கொடுத்து முன்பதிவு செய்து விட்டால் போதுமானது. இல்லையெனில் விசேஷத்தில் புகுந்த குரங்குகளை விரட்ட ரூ.10 ஆயிரம் வரை செலவிட வேண்டும் என்பது குறிப்பிடத்தக்கது.

இதனால் திருமணத்தில் மற்ற செலவுகளுடன் லங்கூர் குரங்குகளுக்கான வாடகைச் செலவும் கட்டாயம் இடம்பெறுகிறது.

மேலும் ஆக்ராவில் கடந்த சில ஆண்டுகளில் குரங்குகளின் எண்ணிக்கை பல மடங்கு அதிகரித்துள்ளதே இவற்றுக்கு காரணம் என்று கூறப்படுகிறது.