நாட்டின் பல பாகங்களிலும் சிறப்பாக கொண்டாடப்படும் பொங்கல் பண்டிகை!

யாழ்.குடாநாட்டில் உழவர் திருநாளான தைப்பொங்கல் இன்றைய தினம் மக்கள் மிக உற்சாகமாக கொண்டாடிக்கொண்டு இருக்கின்றார்கள்.
நேற்றய தினம் மாலை தொடக்கம் குடாநாடு முழுவதும் வெடிச்சத்தங்களால் அதிர்ந்தது. இந்நிலையில் இன்றைய தினம் காலை மக்கள் தங்கள் வீடுகளில் பொங்கலை பொங்கி கொண்டாடினர்.

மேலும் யாழ்.நகரப்பகுதி உள்ளிட்ட பகுதிகளில் வர்த்தக நிலையங்களுக்கு முன்பாகவும் பொங்கி பொங்கலை விமர்சையாக கொண்டாடினர்.



மலையகமொங்கும் சிறப்பாக கொண்டாடப்படும் பொங்கல் பண்டிகை

மலையகத்தில் மலையக மக்கள் இன்று தை பொங்கல் பண்டிகையை வெகுவிமர்சியாக கொண்டாடிகின்றார்கள்.

சூரிய பகவானுக்கு நன்றி செலுத்தும் பண்டிகையே பொங்கல் பண்டிகையாகும். இதனை முன்னிட்டு இன்று அட்டன் ஸ்ரீ மாணிக்கபிள்ளையார் ஆலயத்தில் சந்திரகாந்த குருக்கள் தலைமையில் காலை வேளையில் சூரிய பொங்கல் மிக சிறப்பாக நடைபெற்றன.

இதில் பல பக்தர்கள் கலந்து கொண்டு வழிபாட்டில் ஈடுப்பட்டனர்.




மட்டக்களப்பு, அம்பாறை மாவட்ட ஆலயங்களில் நடைபெற்ற தைத்திருநாள் வழிபாடுகள்

இந்துக்களின் முக்கிய பண்டிகையான தைத்திருநாளை உலகெங்கும் உள்ள இந்துக்கள் சிறப்பாக கொண்டாடிவருகின்றனர்.

தைத்திருநாளை முன்னிட்டு இந்து ஆலங்களில் விசேட பூஜைகள் இன்று காலை நடைபெற்றன.

மட்டக்களப்பு மாவட்டத்தில் உள்ள ஆலயங்களில் தைத்திருநாள் வழிபாடுகள் சிறப்பாக நடைபெற்றுவருகின்றன.

மட்டக்களப்பு மாவட்டத்தின் வரலாற்று சிறப்புமிக்க அமிர்தகழி ஸ்ரீமாமாங்கேஸ்வரர் ஆலயத்தில் தைத்திருநாள் வழிபாடுகள் சிறப்பான முறையில் நடைபெற்றது.

இந்த வழிபாட்டின்போது புதிய ஜனாதிபதிக்கும் புதிய அரசாங்கத்துக்கும் ஆசிவேண்டி விசேட பிரார்த்தனையும் நடத்தப்பட்டது.

இந்த வழிபாடுகளில் பெருமளவான மக்கள் கலந்துகொண்டதுடன் தைத்திருநாள் வாழ்த்துகளையும் தெரிவித்துக்கொண்டனர்.

இதேவேளை அம்பாறை மாவட்டத்தின் வரலாற்று சிறப்புமிக்க வீரமுனை ஸ்ரீசிந்தாயாத்திரைப்பிள்ளையார் ஆலயத்தில் தைத்திருநாள் வழிபாடுகள் சிறப்பாக நடைபெற்றன.

விசேடமாக அமைக்கப்பட்ட அலங்கார பந்தலில் பொங்கல் பொங்கப்பட்டு இந்த வழிபாடுகள் மேற்கொள்ளப்பட்டன.

இந்த நிகழ்வில் வீரமுனை பிரதேசத்தினை சேர்ந்த பெருமளவான மக்கள் கலந்து கொண்டு வழிபாடுகளை மேற்கொண்டமை குறிப்பிடத்தக்கது.

அமைச்சர் திகாம்பரம் தலைமையில் ஹட்டனில் பொங்கல் விழா

2015 ஆம் ஆண்டிற்கான தைப்பொங்கல் விழா தொழிலாளர் தேசிய சங்கத்தின் ஏற்பாட்டில் தோட்ட உட்கட்டமைப்பு அமைச்சர் பி.திகாம்பரம் தலைமையில் இன்று ஹட்டன் டீ.கே.டபிள்யூ மண்டபத்தில் சிறப்பாக இடம்பெற்றது.