300 ரூபாய் தகராறில் ஜனாதிபதி விருது பெற்ற மாற்றுத் திறனாளி சுட்டுக் கொலை

டெல்லியில் ஜனாதிபதி விருது பெற்ற மாற்றுத் திறனாளி ஒருவர், 300 ரூபாய்க்காக சுட்டுக் கொலை செய்யப்பட்டுள்ளார்.
வடக்கு டெல்லியில் உள்ள சீலாம்பூர் பகுதியில், பெட்டிக்கடை வைத்து நடத்தி வந்த காது கேட்காத, வாய் பேசாத மாற்றுத் திறனாளி வினோத், சிறந்த மாற்றுத் திறனாளி கல்வியாளர் என்ற ஜனாதிபதி விருதை பெற்றவர்.

வினோத்திடம் சல்மான் என்ற வாடிக்கையாளர் 300 ரூபாய்க்கு பொருட்கள் வாங்கி விட்டு கடன் வைத்துள்ளார்.

இந்த கடன் தொகையை திருப்பியளிக்குமாறு வினோத் கேட்ட போது இருவருக்கும் இடையே தகராறு ஏற்பட்டுள்ளது.

பின்னர் வினோத், தனது சகோதரருடன் சீலாம்பூர் மெட்ரோ ரயில் நிலையத்துக்கு சென்ற போது, சல்மான் அவரிடம் தகராறில் ஈடுபட்டுள்ளார்.

அப்போது திடீரென துப்பாக்கியை எடுத்த சல்மான் வினோத்தை நோக்கி சுட்டுள்ளார்.

வினோத்தின் தலையில் குண்டு பாய்ந்ததில் அவர் ரத்த வெள்ளத்தில் சரிந்துள்ளார்.

இதையடுத்து அவரை அவரது சகோதரர் கமல் மருத்துவமனைக்கு கொண்டு சென்றுள்ளார்.

ஆனால் வினோத் வழியிலேயே இறந்துவிட்டதாக மருத்துவர்கள் தெரிவித்துள்ளனர்.

தற்போது இது தொடர்பாக வழக்கு பதிவு செய்துள்ள பொலிசார் சல்மானை தீவிரமாக தேடி வருகின்றனர்.