சட்டமன்ற உறுப்பினர் விஜயதரணியை காணவில்லை: பேனரால் பரபரப்பு

காங்கிரஸ் கட்சி சட்டமன்ற உறுப்பினர் விஜயதரணியை காணவில்லை என அவரது தொகுதியில் ஒட்டப்பட்ட பேனரால் பரபரப்பு ஏற்பட்டுள்ளது.
காங்கிரஸ் கட்சியை சேர்ந்த கன்னியாகுமரி மாவட்டம் விளவங்கோடு சட்டமன்ற தொகுதி எம்.எல்.ஏ விஜயதரணி தொகுதிக்கு வருவதில்லை என தொடர்ந்து புகார் எழுந்து வந்தது.

இந்நிலையில், 'விஜயதரணி எம்.எல்.ஏ .வை காணவில்லை' என அவரது தொகுதியில் தமிழ் மாநில காங்கிரஸ் கட்சியினரால் வைக்கப்பட்டுள்ள பேனரால் பரபரப்பு ஏற்பட்டுள்ளது.

பேனர் விவகாரம் குறித்து விஜயதரணி கூறுகையில், நான் வாரத்தில் 3 நாள் தொகுதியில் மக்களை சந்தித்து அவர்களின் குறைகளை கேட்டு நடவடிக்கை எடுத்துக் கொண்டு வருகிறேன்.

'கிராமம் போவோம் மக்களை சந்திப்போம்' என்கிற நிகழ்ச்சி மூலம் நானே மக்களை நேரடியாக தேடிச்சென்று சந்தித்தும் வருகிறேன்.

அடிக்கடி நான் தொகுதி மக்களை சந்திப்பது, நலப்பணித் திட்டங்களை தொடங்கி வைப்பது என செய்திகள் பத்திரிக்கைகளில் வந்துகொண்டுதான் இருக்கிறது.

என்னை காணவில்லை என்று பேனர் வைத்த இடத்தின் அருகே மறுநாள் நான் நிகழ்ச்சியை நடத்தியுள்ளேன்.

சட்டமன்றத் தேர்தலை மனதில் கொண்டு சில கட்சிகள் இப்படி நகைப்புக்குரிய வேலைகளை செய்கிறார்கள் என தெரிவித்துள்ளார்.