நாளை காலை சரணடைகிறேன்…. வாட்ஸ் அப்பில் தகவல் தெரிவித்த யுவராஜ்

சிபிசிஐடி போலீஸ் முன்பு நாளை காலையில் சரண் அடையப்போவதாக கோகுல்ராஜ் கொலை வழக்கில் தேடப்பட்டு வரும் முக்கிய குற்றவாளி யுவராஜ், வாட்ஸ் ஆப் மூலம் தகவல் தெரிவித்துள்ளார்.
தலித் இளைஞர் கோகுல் ராஜ் கொலை வழக்கு மற்றும் டிஎஸ்பி விஷ்ணுப்ரியா தற்கொலை வழக்கை ஆகியவற்றை இணைத்து சிபிசிஐடி பொலிசார் விசாரணை நடத்தி வருகின்றனர்.

இதன் காரணமாக சேலம் ஆவாரம்பாளையத்தில் உள்ள யுவராஜின் வீடு, சங்ககிரியில் உள்ள அவரது சகோதரர் வீடு உள்ளிட்ட 5 இடங்களில் நேற்று சி.பி.சி.ஐ.டி பொலிசார் சோதனை நடத்தினர்.

அப்போது யுவராஜ் மனைவி பயன்படுத்திய செல்போன், உறவினரிடம் இருந்த ஒரு செல்போன், யுவராஜின் வீட்டில் இருந்த கண்காணிப்பு கேமராக்கள், கணினியின் ஹார்ட் டிஸ்க் ஆகியவற்றை சி.பி.சி.ஐ.டி பொலிசார் எடுத்துச் சென்றதாக கூறப்படுகிறது.

இந்நிலையில் ஞாயிறு(நாளை) காலை 10.30 மணிக்கு நாமக்கல் சிபிசிஐடி பொலிஸில் சரண் அடையப்போவதாக யுவராஜ் வாட்ஸ் அப் மூலம் அறிவித்துள்ளார்.

மேலும், தான் கோர்ட்டில் சரணடையப் போவதில்லை என்றும் நாமக்கல் சிபிசிஐடி அலுவலகத்தில் எஸ்.பி.அன்பு, எஸ்.பி.நாகஜோதி முன் சரண் அடைய உள்ளதாகவும் அவர் கூறியுள்ளார்.

கோகுல்ராஜ் கொலை வழக்கில் சிபிசிஐடி போலிசாரின் விசாரணை சரியான வழியில் செல்வதால் சரணடைய முடிவு செய்திருப்பதாகவும் யுவராஜ் தெரிவித்துள்ளார்.

தனது மனைவி மற்றும் உறவினர்களை சிபிசிஐடி பொலிசார் துன்புறுத்தவில்லை என்றும் எனவே இதுவே தான் சரணடைய சரியான தருணமாக கருதுவதாகவும் யுவராஜ் தனது அடியோவில் கூறியுள்ளார்.

யுவராஜ் சரணடைந்தால் கோகுல்ராஜ் மற்றும் விஷ்ணுப்பிரியா வழக்குகளில் மேலும் பல தகவல்கள் வெளிவரும் என்று கூறப்படுகிறது.