மாகாண சபை உறுப்பினர்கள் நியமன விவகாரம்! ஐ.தே.க. பொதுச் செயலாளருக்கு நீதிமன்றம் இடைக்காலத் தடை

ஊவா மாகாண சபைக்கு உறுப்பினர்கள் நியமன விவகாரத்தில் எதிர்வரும் செப்டம்பர் 09ந் திகதி வரை ஐ.தே.க. பொதுச் செயலாளருக்கு இடைக்காலத் தடை விதித்து கொழும்பு மாவட்ட நீதிமன்றம் உத்தரவிட்டுள்ளது.
ஊவா மாகாண சபைத் தேர்தலில் ஐ.தே.க. சார்பில் போட்டியிட்டிருந்த பிரதீப் விஜயவர்தன என்பவர் தொடர்ந்த வழக்கின் அடிப்படையில் இந்த தடை உத்தரவு விதிக்கப்பட்டுள்ளது.

மாகாண சபைத் தேர்தலில் போட்டியிட்டு ஊவா மாகாண சபைக்குத் தெரிவாகாத ஐ.தே.க. வேட்பாளர்களில் விருப்பு வாக்கு அடிப்படையில் பிரதீப் விஜயவர்தன தற்போது முன்னணியில் இருக்கின்றார்.

எனினும் நாடாளுமன்றத் தேர்தல் காரணமாக மாகாண சபையில் ஏற்பட்டுள்ள இரண்டு வெற்றிடங்களுக்கு தனக்குப் பதிலான வேறு இருவரை நியமிக்க கட்சி தீர்மானித்திருப்தபாகவும், அதனை தடை செய்து இடைக்காலத் தடை உத்தரவு வழங்குமாறும் மனுதாரர் நீதிமன்றத்திடம் கோரிக்கை வைத்திருந்தார்.

இதன் அடிப்படையில் எதிர்வரும் செப்டம்பர் 09ந் திகதி வரை ஊவா மாகாண சபைக்கு உறுப்பினர்களை நியமிக்கும் விவகாரத்தில் கொழும்பு மாவட்ட நீதிமன்ற நீதிபதி அஜித் அனவரத்ன ஐ.தே.க. பொதுச் செயலாளர் கபீர் ஹாசிமுக்கு இடைக்காலத் தடை உத்தரவு பிறப்பித்துள்ளார்.