வறுமையில் சிக்கியுள்ள பரவை முனியம்மா: முதல்வர் ஜெயலலிதா ரூ.6 லட்சம் நிதியுதவி

வறுமையால் வாடும் நாட்டுப்புற கலைஞரும், திரைப்பட நடிகையுமான பரவை முனியம்மாவுக்கு தமிழக முதல்வர் ஜெயலலிதா ரூ.6 லட்சம் நிதியுதவி வழங்க உத்தரவிட்டுள்ளார்.
இது தொடர்பாக அதிமுக தலைமைக்கழகம் வெளியிட்டுள்ள அறிக்கையில் குறிப்பிடப்பட்டுள்ளதாவது:-

“பிரபல நாட்டுப்புற பாடகியும், திரைப்பட நடிகையுமான பரவை முனியம்மா தனது குடும்பத்தின் ஏழ்மை நிலையையும், தன் முதுமை காரணமாக தனக்கு ஏற்பட்டுள்ள வறுமைச் சூழலையும் விவரித்து பேட்டியளித்திருந்தார்.

அதில் தனக்கும், தனது குடும்பத்திற்கும் மறுவாழ்வு தருகின்ற வள்ளலாக தமிழக முதல்வர் ஜெயலலிதா மட்டும் தான் இருக்க முடியும் என்று நம்பிக்கை தெரிவித்திருந்தார்.

அவரின் ஏழ்மை நிலையையும், இயலாமையையும் உடனடியாக அறிந்த அதிமுக பொதுச்செயலாளரும், முதல்வருமான ஜெயலலிதா, அவருக்கு ரூ.6 லட்சம் நிதியுதவியும், குடும்ப செலவுகளுக்கென்று மாதந்தோறும், 6 ஆயிரம் ரூபாயும் வழங்க ஆணையிட்டுள்ளார்.

மேலும், பரவை முனியம்மா அவர்களின் மருத்துவ சிகிச்சைக்கு தேவையான நிதியுதவியை 'புரட்சித் தலைவர் டாக்டர்.எம்ஜிஆர் அறக்கட்டளை’ ஏற்கும் என்று அறிவித்துள்ளார்.” என்று அந்த செய்திக்குறிப்பில் தெரிவிக்கப்பட்டுள்ளது.