பிரித்தானியாவில் நாடு கடத்தலை எதிர்நோக்கியுள்ள இலங்கையருக்கு ஆதரவாக ஆர்ப்பாட்டம்

பிரித்தானியாவில் இருந்து நாடு கடத்தலை எதிர்நோக்கியுள்ள இலங்கையருக்கு தமது ஆதரவை வெளியிடும் முகமாக இன்று தொழிற்சங்கத்தினரும் மனித உரிமை நடவடிக்கையாளர்களும் ஆர்ப்பாட்டம் ஒன்றை நடத்தவுள்ளனர்
தென்யோக்செயாரில் வசிக்கும் ஜனகன் சிவாநந்தன் என்பவரே நாடு கடத்தலை எதிர்நோக்கியுள்ளராவார்.

இவர், 2009ஆம் ஆண்டு பாடசாலை மாணவராக இருந்த போது இலங்கைப்படையினரால் சித்திரவதைக்கு உட்படுத்தப்பட்டதாக குற்றம் சுமத்தப்பட்டுள்ளது.

இதனை உறுதிப்படுத்தும் முகமாக அவரின் உடம்பில் அடிகாயங்களுக்கான அடையாளங்களும் உள்ளன.

அத்துடன் ஜனகன் 10 நாட்கள் வரை படையினரால் தடுத்து வைக்கப்பட்டிருந்தாகவும் தெரிவிக்கப்பட்டுள்ளது.

இந்தநிலையில் பிரித்தானியாவுக்கு சென்று அரசியல் அடைக்கலம் கோரியுள்ள இவர், தற்போது அந்நாட்டு குடிவரவு தடுப்பு முகாமில் வைக்கப்பட்டுள்ளார்.

இவர் தொடர்பான விசாரணை எதிர்வரும் ஜூலை 15ஆம் திகதியன்று நடைபெறவுள்ளது.

இதன்போது அவரின் தடுத்து வைத்தல் காலம் நீடிக்கப்படலாம் என்று எதிர்பார்க்கப்படுவதாக தமிழ் தரப்பினர் தெரிவித்துள்ளனர்.