திருப்பதியில் மொட்டை போட்ட முன்னாள் முதல்வர் ஓ.பன்னீர்செல்வம்

சொத்துக் குவிப்பு வழக்கில் ஜெயலலிதா விடுதலை பெற்றதற்காக தமிழக முன்னாள் முதல்வர் ஓ.பன்னீர்செல்வம் இன்று திருப்பதியில் முடி காணிக்கை செலுத்தியுள்ளார்.
சொத்துக் குவிப்பு வழக்கில், ஜெயலலிதா கடந்த ஆண்டு சிறைத்தண்டனை மற்றும் அபராதம் பெற்றதை அடுத்து, தமிழக அமைச்சர்கள் உள்ளிட்ட அதிமுகவினர் கோவில்களில் ஜெயலலிதா விடுதலை பெற வேண்டி சிறப்பு பூஜைகள் செய்து வழிபட்டனர்.

இந்நிலையில், ஜெயலலிதா ஜாமீன் பெற்று, மேல்முறையீடு செய்து வழக்கிலிருந்து விடுதலை பெற்று தமிழக முதல்வராக மீண்டும் கடந்த மாதம் பதவி ஏற்றார்.

இதையடுத்து ஜெயலலிதா விடுதலை பெற்றதற்காக அதிமுக பிரமுகர்கள் கோவில்களில் தங்களின் நேர்த்திக் கடன்களை செலுத்தினர்.

இந்நிலையில், இன்று திருப்பதி வெங்கடேச பெருமாள் கோவிலில் தமிழக நிதி மற்றும் பொதுப் பணித்துறை அமைச்சர் ஓ.பன்னீர்செல்வம் மொட்டை அடித்து நேர்த்திக் கடனை செலுத்தியுள்ளார்.