முன்னாள் பிரதமர் வாஜ்பாயி இறந்ததாக நினைத்து பள்ளிக்கு விடுமுறை விட்ட முதல்வர்

முன்னாள் பிரதமர் வாஜ்பாயி இறந்துவிட்டதாகக் கூறி ஒடிஷாவில் பள்ளிக்கு முதல்வர் விடுமுறை அளித்த சம்பவம் அதிர்ச்சியை ஏற்படுத்தியுள்ளது.
ஒடிஷா மாநிலம் பலசூர் மாவட்டத்தில் உள்ள துவக்கப் பள்ளி ஒன்றின் முதல்வராக இருப்பவர் கமலகந்தா தாஸ். இவர் கடந்த வெள்ளிக்கிழமை மற்றொரு பள்ளியில் நடைபெற்ற ஆசிரியர்கள் பயிற்சி முகாமில் கலந்து கொண்டார்.

அப்போது அந்த முகாமில் கலந்து கொண்ட ஆசிரியர் ஒருவர் தாஸிடம் முன்னாள் பிரதமர் வாஜ்பாயி இறந்துவிட்டதாக தெரிவித்துள்ளார்.

இதை உண்மையென நம்பிய தாஸ் பள்ளிக்கு வந்து வாஜ்பாயி இறந்துவிட்டதாகக் கூறி இரங்கல் கூட்டத்தை நடத்தியுள்ளார்.

பின்னர் பள்ளிக்கு விடுமுறையும் அளித்துள்ளார்.

இதையறிந்த பெற்றோர்கள் அதிர்ச்சி அடைந்தனர். உடனே இது குறித்து மாவட்ட கலெக்டர் சனதான் மாலிக்கிடம் புகார் அளித்தனர்.

இது குறித்து மாலிக் செய்தியாளர்களிடம் கூறியதாவது, தாஸ் சஸ்பெண்ட் செய்யப்படுவார்.

தேவைப்பட்டால் அவர் மீது கிரிமினல் நடவடிக்கை எடுக்கப்படும் என்று தெரிவித்துள்ளார்.