கையெழுத்தை திரும்பப்பெற போவதாக அச்சுறுத்தும் எம்.பிக்கள்

பிரதமர் ரணில் விக்ரமசிங்கவுக்கு எதிரான நம்பிக்கையில்லாப் பிரேரணை தொடர்பான யோசனையில் கையெழுத்திட்டுள்ள ஐக்கிய மக்கள் சுதந்திர முன்னணியின் 35 நாடாளுமன்ற உறுப்பினர்கள் தமது கையெழுத்தை திரும்பப்பெற போவதாக அச்சுறுத்தியுள்ளனர்.
நாடாளுமன்றத்திற்கு முதலில் 20வது திருத்தச் சட்டத்தை கொண்டு வர வேண்டும் என இந்த நாடாளுமன்ற உறுப்பினர்கள் கூறியுள்ளதாக அமைச்சரவைப் பேச்சாளரான அமைச்சர் ராஜித சேனாரத்ன தெரிவித்துள்ளார்.

நம்பிக்கையில்லாப் பிரேரணையை விட 20வது திருத்தச் சட்டத்திற்கு முன்னுரிமை கொடுக்கப்பட வேண்டும் என இந்த 35 நாடாளுமன்ற உறுப்பினர்கள் கோரியுள்ளதுடன்,

அவர்கள் பிரேரணை தொடர்பான யோசனையில் தாம் இட்டுள்ள கையெழுத்தை திரும்ப பெறக் கூடும் எனவும் அமைச்சர் சேனாரத்ன கூறியுள்ளார்.

பிரதமருக்கு எதிரான நம்பிக்கையில்லாப் பிரேரணை தொடர்பான யோசனை நேற்று மதியம் எதிர்க்கட்சியினரால் நாடாளுமன்ற செயலாளரிடம் கையளிக்கப்பட்டுள்ளது.