வித்தியாசமாக தோற்றமளித்த தொண்டர்கள்: வீட்டிற்கே அழைத்து பேசிய ஜெயலலிதா

தமிழக முதல்வராக நேற்று பொறுப்பேற்றுக்கொண்ட ஜெயலலிதா, வீடு திரும்பிய போது குறிப்பிட்ட சில தொண்டர்களை வீட்டுக்குள் அழைத்து அவர்களுடன் புகைப்படம் எடுத்துக் கொண்டுள்ளார்.
தமிழக முதல்வராக நேற்று பொறுப்பேற்றுக்கொண்ட பிறகு ஜெயலலிதா, தனது போயஸ் கார்டன் இல்லத்துக்கு திரும்பி கொண்டிருந்தார்.

அப்போது, அவரை வரவேற்க திரண்டிருந்த ஏராளமான அதிமுக தொண்டர்களில் விழுப்புரம் மாவட்டத்தைச் சேர்ந்த 12 பேர், அதிமுக கொடி வண்ணத்தை உடல் முழுவதும் பூசிக்கொண்டு நின்றிருந்தனர்.

அவர்களை கவனித்த ஜெயலலிதா, புன்னகையுடன் கடந்து சென்றார். பின்னர் வீட்டுக்குள் சென்ற சில நிமிடங்களில், அவரது உதவியாளர்கள் வெளியே வந்து அந்த 12 பேரையும் ஜெயலலிதாவின் வீட்டுக்குள் அழைத்துச் சென்றனர்.

இதுபற்றி அந்த நபர்கள் கூறுகையில், முதல்வர் எங்களுக்கு அன்பளிப்பு வழங்கினார்.

மேலும் எங்களுடன் புகைப்படம் எடுத்துக் கொண்டதோடு, கட்சிக்காக அயராது உழைக்க வேண்டும் என அறிவுரை வழங்கினார் என்று கூறியுள்ளனர்.