வாழைச்சேனையில் பல நாள் கள்வர்கள் மூவர் கைது

வாழைச்சேனை பொலிஸ் பிரிவுக்குட்பட்ட வாழைச்சேனை, மீறாவோடை, கிண்ணையடி, மாஞ்சோலை, கறுவாக்கேணி போன்ற பிரதேசங்களில் மிக நீண்டகாலமாக கொள்ளைச் சம்பவங்களில் ஈடுபட்டு வந்த மூன்று பேரை,வாழைச்சேனை பொலிஸார் நேற்று கைது செய்துள்ளனர்.
மேற்படி பகுதிகளில் கொள்ளைச் சம்பவங்கள் இடம்பெற்று வந்ததையடுத்து வாழைச்சேனை உதவி பொலிஸ் அத்தியட்சகர் எச்.ஓ.எஸ்.விதானகேயின் ஆலோசனையின் கீழ் வாழைச்சேனை பொலிஸ் நிலைய பொறுப்பதிகாரி,திப்புட்டுமுனயின் வழிகாட்டலில் பொலிஸ் நிலைய குற்றப் பிரிவு பொறுப்பதிகாரி எல்.அமரசிங்க தலைமையில் நியமிக்கப்பட்ட பொலிஸ் குழுவினர் மேற்கொண்ட விசாரணைகளின் அடிப்படையிலேயே இக்கொள்ளைக் கும்பல் கைது செய்யப்பட்டுள்ளது.

மேற்படி சந்தேக நபர்களிடமிருந்து தொலைக்காட்சி, மடிகணனி, சீடி பிளேயர், கைபேசிகள், தங்க நகைகள், சாஜர் டோச் லைட் போன்ற பொருட்கள் கைப்பற்றப்பட்டுள்ளது.

இவர்களுடன் மேலும் சிலருக்கு தொடர்பு இருக்கலாம் என்ற சந்தேகத்தில் பொலிஸார் மேலதிக விசாரணைகளை மேற்கொண்டு வருகின்றனர்.

குறித்த குழுவிலிருந்த இருவர் ஒரே குடும்பத்தை சேர்ந்தவர்கள் என்றும், மற்றையவர் அவர்களின் நண்பர் என்றும் ஆரம்ப கட்ட விசாரணைகளிலிருந்து தெரிய வந்துள்ளதாக வாழைச்சேனை பொலிஸ் நிலைய குற்றப் பிரிவு பொறுப்பதிகாரி எல்.அமரசிங்க தெரிவித்தார்.