ஜெயலலிதா வழக்கில் எனக்கு தனிப்பட்ட விருப்பமில்லை: பவானிசிங் அதிரடி பேட்டி

ஜெயலலிதா மேல்முறையீட்டு வழக்கில் ஆஜராக வேண்டும் என்று எனக்கு தனிப்பட்ட விருப்பம் எதுவும் கிடையாது என்று அரசு வழக்கறிஞரான பவானிசிங் தெரிவித்துள்ளார்.
தமிழக முன்னாள் முதல்வர் ஜெயலலிதா மீதான சொத்துக் குவிப்பு வழக்கில், சிறப்பு நீதிமன்றத்தில் அரசு வழக்கறிஞராக வாதிட்டவர் பவானிசிங்.

சிறப்பு நீதிமன்றம் அந்த வழக்கில் ஜெயலலிதாவுக்கு 4 வருட சிறையும், 100 கோடி அபராதமும் விதித்தது.

இந்த தண்டனையை எதிர்த்து கர்நாடக உயர் நீதிமன்றத்தில் ஜெயலலிதா மற்றும் தண்டனை பெற்ற மற்ற மூவரும் மேல்முறையீடு செய்தனர்.

இந்த மனு மீதான விசாரணைக்காக, அரசு வழக்கறிஞராக யாரையும் கர்நாடக அரசு நியமிக்காத நிலையில், தமிழக லஞ்ச ஒழிப்புத்துறையின் அனுமதியின் பேரில் பவானிசிங், அரசு வழக்கறிஞராக வாதிட்டு வருகிறார்.

இந்நிலையில், திமுகவின் அன்பழகன் சார்பில் உச்ச நீதிமன்றத்தில், பவானிசிங் மீது நம்பிக்கையில்லை என்றும், அவர் முறைப்படியாக அரசு வழக்கறிஞராக நியமிக்கப்படவில்லை எனவும் மனுத் தாக்கல் செய்யப்பட்டது.

அந்த மனு மீதான விசாரணை தற்போது மூவர் அமர்வுக்கு மாற்றப்பட்டுள்ளது. நாளை, ஏப்ரல் 21ம் திகதி அந்த அமர்வு விசாரணையை ஆரம்பிக்கிறது.

இந்த வழக்கின் தீர்ப்பை பொறுத்துதான், மேல்முறையீட்டு மனு மீதான தீர்ப்பு உள்ளிட்ட பல நடவடிக்கைகள் அமையும் என்பதால் இவ்வழக்கு முக்கியத்துவம் பெறுகிறது.

பவானிசிங் அளித்த பேட்டி ஒன்றில், எனது நியமனத்துக்கு எதிராக வழக்கு தொடர்ந்துள்ளவருக்கும், அரசுக்கும் இடையேதான் வழக்கு நடந்து வருகிறது.

எனவே, இந்த வழக்கில் எனக்கு தனிப்பட்ட விருப்பு, வெறுப்பு எதுவும் கிடையாது.

நான் எனது கடமையைத்தான் செய்தேன். எனக்கு தனிப்பட்ட முறையில் இந்த வழக்கு முக்கியத்துவம் வாய்ந்தது கிடையாது.

எனவே, உச்ச நீதிமன்றத்தில் நடைபெறும் விசாரணையின்போது எனது தரப்பில் வாதிடப்போவதில்லை என்று கூறியுள்ளார்.