முன்னாள் அமைச்சரிடம் சி.பி.சி.ஐ.டி பொலிசார் விடிய விடிய விசாரணை..அதிகாலையில் அதிரடி கைது

வேளாண்துறை பொறியாளர் தற்கொலை வழக்கில் முன்னாள் அமைச்சர் அக்ரி கிருஷ்ணமூர்த்தி சி.பி.சி.ஐ.டி பொலிசாரால் கைது செய்யப்பட்டுள்ளார்.
திருநெல்வேலியில் கடந்த பிப்ரவரி 20ம் திகதி, வேளாண்துறை பொறியாளர் முத்துக்குமாரசாமி ரயில் முன் பாய்ந்து தற்கொலை செய்து கொண்டார்.

வேளாண் அமைச்சர் அக்ரி கிருஷ்ணமூர்த்தி அவருக்கு கடுமையாக அழுத்தம் தந்ததால் மனஉளைச்சலுக்கு ஆளான அவர் தற்கொலை செய்ததாக சர்ச்சை வெடித்தது.

இதையடுத்து அக்ரி கிருஷ்ணமூர்த்தியின் கட்சிப் பதவிகள் உடனடியாக பறிக்கப்பட்டன.

இவ்வழக்கு சி.பி.சி.ஐ.டி. பொலிசாருக்கு மற்றப்பட்ட நிலையில், எதிர்க்கட்சிகளும் வேளாண் அதிகாரி தற்கொலைக்கு அக்ரி கிருஷ்ணமூர்த்தி தான் காரணம் என்றும் அவரைக் கைது செய்ய வேண்டும் என்றும் போராட்டம் நடத்தி வந்தனர்.

பின்னர் இந்த வழக்கு தொடர்பாக நேரில் ஆஜராகும்படி, முன்னாள் அமைச்சர் அக்ரி கிருஷ்ணமூர்த்திக்கு சிபிசிஐடி காவல்துறையினர் சம்மன் அனுப்பினர்.

இந்நிலையில், சென்னை எழும்பூரில் உள்ள சிபிசிஐடி அலுவலகத்திற்கு வந்த அக்ரி கிருஷ்ணமூர்த்தியிடம் இரவு முழுவதும் விசாரணை நடத்தப்பட்டுள்ளது.

மேலும், இந்த விசாரணையைத் தொடர்ந்து இன்று அதிகாலை 5 மணிக்கு அவரை சிபிசிஐடி பொலிசார் கைது செய்ததாக சிபிசிஐடி காவல்துறை ஐ.ஜி மகேஷ் தெரிவித்துள்ளார்.