ராக்கிங்கில் மலர்ந்த காதல்: தினமும் மனைவி காலில் விழுந்து வணங்கும் மந்திரி

டெல்லி மகளிர் மற்றும் குழந்தைகள் நல மேம்பாட்டு அமைச்சர், தினமும் தன் மனைவியின் காலைத் தொட்டு வணங்குவதாக தெரிவித்துள்ளார்.
அரவிந்த் கெஜ்ரிவால் தலைமையிலான டெல்லி மாநில மந்திரி சபையில், மகளிர் மற்றும் குழந்தைகள் நல மேம்பாட்டு அமைச்சராக சந்தீப் குமார் உள்ளார்.

இந்நிலையில் அமைச்சர் சந்தீப் ஒரு விழாவில் பேசுகையில், என் மனைவி எனக்காக பிறந்தவள்.

அவளை நான் மதிக்கிறேன் அதனால், தினமும் காலையில் அவளது காலைத் தொட்டு வணங்குகிறேன். அப்போது அவள் புன்சிரிப்புடன் வெற்றி பெற என்னை வாழ்த்துவார்.

நாங்கள் இருவரும் முதலில் கல்லூரியில் படித்த போது, நான் அவளை பாட்டுப்பாட சொல்லி ராக்கிங் செய்தேன்.

இதையடுத்து எங்கள் இருவருக்கும் நட்பு ஏற்பட்டு பின்னர் காதலாக மாறியது.

ஏழு ஆண்டுகளாக பழகிவந்த நாங்கள், கடந்த 2011–ம் ஆண்டு ஏப்ரல் மாதம் திருமணம் செய்து கொண்டோம்.

மேலும், நான் மனைவி காலில் விழுவதை என் நண்பர்கள் கேலி செய்வார்கள் என்று தெரிவித்துள்ளார்.

பெண்கள் மீது அன்பும், மரியாதையும் செலுத்தும் இவருக்கு, டெல்லி முதல்வர் அரவிந்த் கெஜ்ரிவால், மகளிர் நல மேம்பாட்டு அமைச்சர் பதவி வழங்கி நியமித்துள்ளது குறிப்பிடத்தக்கது.