பள்ளி விழாவில் ஆசிரியர்களின் காலில் விழுந்து பாராட்டிய தொழிலதிபர்

மதுரையில் நடந்த அரசு பள்ளி பாராட்டு விழாவில் தொழிலதிபர் ஒருவர் ஆசிரியர்களின் காலில் விழுந்துள்ளார்.
கொட்டாம்பட்டியில் அரசு மேல்நிலைப் பள்ளி, அரசு பெண்கள் உயர்நிலைப் பள்ளியில் பத்து, பன்னிரெண்டாம் வகுப்பில் முதல் மூன்று இடங்களைப் பிடித்த மாணவ, மாணவிகளுக்கு பாராட்டு விழா நடைபெற்றது.

இந்த விழாவுக்கு சிறப்பு விருந்தினராகக் கலந்து கொண்ட தொழிலதிபர் ஆர்.கோபாலகிருஷ்ணன் மாணவ, மாணவிகளுக்கு பரிசுத் தொகையை வழங்கினார்.

அதைத் தொடர்ந்து, அந்த மாணவிகளுக்கு பாடம் நடத்திய ஆசிரியர், ஆசிரியைகளை மேடைக்கு அழைத்த அவர் வரிசையாக நிற்க வைத்து திடீரென அவர்களின் காலில் விழுந்தார்.

பின்னர் பேசிய அவர், நானும் இப்பள்ளியின் முன்னாள் மாணவன் தான். ஏழை மாணவ, மாணவிகளுக்கு கல்வி கற்பித்த உங்களை எவ்வளவு பாராட்டினாலும் தகும் என்று பேசியுள்ளார்.

தொழிலதிபர் ஒருவர் அரசு பள்ளி ஆசிரியர்களின் காலில் விழுந்து பாராட்டிய சம்பவம் நெகிழ்ச்சியை ஏற்படுத்தியுள்ளது.