பிரிட்ஜில் காட்சியளித்த சாய்பாபா: பக்தி பரவசத்தில் குவிந்த பக்தர்கள்

தஞ்சாவூர் மாவட்டத்தில் ஒரு பக்தர் வீட்டு பிரிட்ஜில் சாய்பாபா உருவம் தெரிவதாக செய்திகள் பரவியதால் பரபரப்பு ஏற்பட்டுள்ளது.
தஞ்சாவூர் ரயில்வே நகரை சேர்ந்த முத்துசாமி – மணிமேகலை தம்பதியினரின் வீட்டில் உள்ள ஃபிரிட்ஜ் கதவில் திடீரென சாய்பாபா போன்ற உருவம் தெரிந்திருக்கிறது.

இதைப்பார்த்த அவர்கள், சாய்பாபா கோவில் பூசாரிகளிடம் கூறியிருக்கிறார்கள். அவர்களும் அங்கு வந்து பூஜை செய்திருக்கிறார்கள்.

இந்த தகவல் அக்கம், பக்கம் பரவியதால் அங்கு பக்தர்களின் வருகை அதிகரித்து விட்டது. சுமார் ஆயிரத்திற்கும் அதிகமானோர் வந்து சாமி தரிசனம் செய்தனர், அவர்களுக்கு பிரசாதமும் வழங்கப்பட்டது.

கூட்டம் அதிகமாக இருப்பதால் ஏதேனும் அசம்பாவிதம் ஏற்பட்டுவிடக்கூடாது என்ற நோக்கத்தில் காவல்துறையினரும் அந்த இடத்திற்கு சென்றுள்ளனர்.

இதுகுறித்து வீட்டின் உரிமையாளர் கூறியதாவது, கடந்த மூன்று நாட்களாகவே எங்கள் வீட்டு பிரிட்ஜில் சாய்பாபா உருவம் தெரிகிறது.

பகல் முழுவதும் அந்த உருவம் தெரியும். இரவில் மறைந்து விடுகிறது. சாய்பாபாவை தரிசிக்க அதிகப்படியான கூட்டம் வருகிறது. அவர்களை கலைந்து போங்கள் என்று கூறினாலும் அவர்கள் செல்வதில்லை. இதனால் எங்களுக்கு சிரமமாக இருக்கிறது என்று கூறியுள்ளார்.