இன்று சனிப்பெயர்ச்சி: சனீஸ்வரர் ஆலயத்தில் குவிந்த பக்தர்கள்

சனிப்பெயர்ச்சியை முன்னிட்டு இன்று மலையடிவாரம் சனீஸ்வரர் ஆலயத்தில் ஏராளமான பக்தர்கள் வழிபாடு நடத்தினர்.

2½ வருடத்திற்கு ஒருமுறை நடைபெறும் சனிப்பெயர்ச்சியானது இன்று துலாம் ராசியில் இருந்து விருச்சிக ராசிக்கு சனிபகவான் இடம் பெயர்கிறார். இதனை முன்னிட்டு பல்வேறு கோவில்களிலும் நவகிரக சன்னதியிலும் பக்தர்கள் இன்று அதிகாலை முதல் வழிபாடு செய்து வருகின்றனர்.

திண்டுக்கல் மலையடிவாரத்தில் அமைந்துள்ள சனீஸ்வர பகவான் ஆலயத்தில் காலை 6 மணிக்கு விநாயகர் ஹோமம், நவகிரக ஹோமம் நடைபெற்றது. அதனைத் தொடர்ந்து சனீஸ்வர பகவானுக்கு சிறப்பு அபிஷேகங்கள் செய்யப்பட்டு அலங்காரம், தீபாராதனை நடத்தப் பட்டது.

அதிகாலை முதலே கோவிலுக்கு ஏராளமான பக்தர்கள் வருகை தந்து எள் தீபம் ஏற்றியும், வஸ்திர தானம் செய்தும் அன்னதானம் செய்தும் வழிபாடு நடத்தினர்.

சனிப்பெயர்ச்சியை முன்னிட்டு பல்வேறு ராசிக்காரர்கள் தங்கள் ராசிகளுக்கு சிறப்பு அர்ச்சனை செய்து கொண்டனர். இதே போல் நாகல்நகர் சித்திவிநாயகர் கோவில், ராம்நகர் விநாயகர்கோவில் உள்பட பல்வேறு கோவில்களில் சிறப்பு வேள்விகள் நடத்தப்பட்டன. ஏராள மான பக்தர்கள் தங்கள் குடுத்பத்தினருடன் வந்து பூஜையில் கலந்து கொண்டனர்.