அன்பளிப்பு எனக்கெதற்கு? முதல்வரை ஆச்சர்யத்தில் ஆழ்த்திய பொலிஸார்

தெலுங்கானாவில் அன்பளிப்பு வாங்க மறுத்த பொலிஸார் ஒருவரை தெலுங்கானா முதல்வர் சந்திரசேகர ராவ் நேரில் அழைத்து பாராட்டியுள்ளார்.
தெலுங்கானா மாநிலம் ஜூப்ளி ஹில்ஸ் பகுதியில் உள்ள காவல் நிலையத்தில், பணிபுரிந்து வரும் ஜி.நாராயணராவ் என்பவர், நேற்று முன்தினம் பாஸ்போர்ட்டுக்கு விண்ணப்பித்திருந்த ஒரு குடும்பத்தினரை நேரில் சந்தித்து தகவல்களைச் சரி பார்க்கச் சென்றார்.

அந்த விசாரணையின் முடிவில் தங்களது மகிழ்ச்சியை வெளிப்படுத்த விரும்பிய அக்குடும்பத்தினர், நாராயணராவுக்கு ரூ 2500 அன்பளிப்பாக கொடுத்துள்ளனர்.

ஆனால், அந்த அன்பளிப்பைப் பெற மறுத்த நாராயணராவ், அரசு எனக்கு சம்பளம் தருகிறது. அதனால் எந்தவித அன்பளிப்பும் தேவை இல்லை.

எங்களது தேவைகளையெல்லாம் முதல்வர் தாராளமாகவே செய்து வருகிறார் எனத் தெரிவித்துள்ளார்.

அந்த குடும்பத்தினர் தெலுங்கானா முதல்வர் சந்திரசேகர ராவின் குடும்ப மருத்துவருடைய குடும்பம் என்பதால் இது தொடர்பாக முதலமைச்சர் சந்திரசேகர ராவுக்கு கடிதம் மூலம் இத்தகவலை தெரிவித்தனர்.

இதையடுத்து முதல்வரும் அந்த பொலிஸாரின் நேர்மையை அங்கீகரிக்கும் விதமாக தனது வீட்டுக்கு நேரில் அழைத்து பாராட்டுக்களைத் தெரிவித்துள்ளார்.