முதல்வரை கட்டியணைத்து முத்தமிட்ட மாந்த்ரீகர்: வீடியோவால் பரபரப்பு

பீகார் மாநில முதல்வர் நிதீஷ் குமாரை மாந்திரீகர் கட்டியணைத்து முத்தமிட்டு வாழ்த்தும் வீடியோ ஒன்று வெளியாகி பரபரப்பை ஏற்படுத்தியுள்ளது.
ஐக்கிய ஜனதா தளக் கட்சியின் மூத்த தலைவரும், பீகார் மாநில முதல்வருமான நிதீஷ் குமார் மாந்திரீகர் ஒருவரை சந்தித்துள்ளார்.

இது தொடர்பான வீடியோவில், நிதீஷ் குமாரை மாந்திரீகர் ஆசிர்வதிக்கும் காட்சியும், அவரை கட்டியணைத்து முத்தமிடும் காட்சியும் உள்ளது.

மேலும், நிதீஷ் குமார் வாழ்க என்றும், லாலு பிரசாத் ஒழிக என்றும் மாந்திரீகர் தெரிவிப்பது போன்ற காட்சியும் உள்ளது. இந்த வீடியோவால் பீகார் அரசியலில் புதிய சர்ச்சை ஏற்பட்டுள்ளது.

இந்த வீடியோ பற்றி நிதிஷ்குமார் நிருபர்களிடம் விளக்கம் அளிக்கையில், மந்திரவாதியை நான் எனது கட்சி எம்.எல்.சி. நீரஜ்குமார் வீட்டில் 2014–ம் ஆண்டு சந்தித்தேன்.

மந்திரவாதி முதல்வர் வீட்டுக்கு வருவது நல்லதல்ல என்பதால் நான் எம்.எல்.சி. வீட்டில் வைத்து சந்தித்தேன்.

அவரைச் சந்தித்ததில் எந்த தவறும் இல்லை. 90 வயது சாமியார் என்னை கட்டிப்பிடித்து முத்தமிடும் போது நான் என்ன செய்ய முடியும்.

அப்போது அவர் லல்லுவுடன் உறவு வேண்டாம் என்றார். ஆனால் நான் இன்று வரை லல்லு பிரசாத்துடன் நல்ல நட்புறவுடன் இருக்கிறேன் என்று தெரிவித்துள்ளார்.

மேலும், லல்லு பிரசாத்திடம் இதுபற்றி கூறுகையில், நானும் மிகப்பெரிய மந்திரவாதிதான் என்று நகைச்சுவையாக கூறியுள்ளார்.