தீவிரவாதிகளின் பிடியில் சித்ரவதையை அனுபவித்தேன்! பாதிரியார் உருக்கமான பேட்டி

ஆப்கானிஸ்தானில் தலிபான் தீவிரவாதிகளின் பிடியில் சித்ரவதையை அனுபவித்ததாக நாடு திரும்பிய தமிழக பாதிரியார் உருக்கமான பேட்டியளித்துள்ளார்.
சிவகங்கை மாவட்டம் தேவகோட்டை அருகே உள்ள வாரியன் வயல் கிராமத்தை சேர்ந்தவர் அலெக்சிஸ் பிரேம்குமார், பாதிரியார்.

ஆப்கானிஸ்தானில் ஏசு சபையின் அகதிகள் சேவை திட்டத்தின் இயக்குனராக பணியாற்றி வந்த அலெக்ஸை, கடந்த 8 மாதங்களுக்கு முன்பு தீவிரவாதிகள் கடத்தி சென்றனர்.

இதனையடுத்து மத்திய அரசின் முயற்சியின் பேரில் கடந்த 22ம் திகதி பாதிரியார் அலெக்சிஸ் பிரேம்குமார் விடுதலை செய்யப்பட்டார்.

டெல்லியிலிருந்து நேற்று விமானம் மூலம் சென்னை வந்தவர், இன்று நிருபர்களுக்கு உருக்கமான பேட்டியொன்றை அளித்தார்.

அதில், மத்திய, மாநில அரசுகளின் முயற்சியாலும் கடவுளின் கிருபையாலும் நான் தலிபான் தீவிரவாதிகளின் பிடியில் இருந்து விடுதலையானேன்.

கடந்த 8 மாதங்களாக தீவிரவாதிகள் என்னை துப்பாக்கி முனையில் சிறை வைத்திருந்தனர், அடிக்கடி அவர்கள் என்னை இடம் மாற்றிக் கொண்டே இருந்தனர்.

என்னை துப்பாக்கி முனையில் வைத்திருந்ததோடு சங்கிலியால் பிணைத்து 5 பூட்டுகளை போட்டு பூட்டி இருந்தனர், இருப்பினும் மனிதாபிமானத்தோடு நடத்தினர்.

என்னை பட்டினி போடவில்லை, உணவு கிடைக்காத சில நேரங்களில் என்னுடன் சேர்ந்து தாலிபான்களும் பட்டினி கிடந்தனர்.

என்னை விடுதலை செய்வதற்கு இந்திய அரசு 20 லட்சம் டொலர் அளித்துள்ளதாகவும், விரைவில் விடுதலை செய்துவிடுவதாகவும் தாலிபான்கள் என்னிடம் தெரிவித்தனர்.

ஆப்கானிஸ்தானுக்கு திரும்பி வந்தால் சுட்டுக் கொன்று விடுதாக மிரட்டினர், ஆனால் மீண்டும் அங்கு செல்ல தயராக இருக்கிறேன் என தெரிவித்துள்ளார்.