மகிந்த மீண்டும் சுதந்திரக் கட்சிக்குள் நுழைய மைத்திரி இடமளிக்க மாட்டார்

ஸ்ரீலங்கா சுதந்திரக் கட்சியின் நாடாளுமன்ற உறுப்பினர்களில் பெரும்பாலானவர்கள், முன்னாள் ஜனாதிபதி மகிந்த ராஜபக்சவுக்கு எதிர்வரும் பொதுத் தேர்தலில் போட்டியிடும் வாய்ப்பையோ, தேசிய பட்டியல் நாடாளுமன்ற உறுப்பினர் பதவியையோ வழங்கக் கூடாது என்ற நிலைப்பாட்டில் இருப்பதாக கூறப்படுகிறது.
அண்மையில் நடைபெற்ற பேச்சுவார்த்தை ஒன்றின் போது இந்த நாடாளுமன்ற உறுப்பினர்கள் இது தொடர்பான உத்தியோகபூர்வமற்ற தீர்மானம் ஒன்றை எடுத்துள்ளதாக ஸ்ரீலங்கா சுதந்திரக் கட்சியின் வட்டாரங்கள் கூறுகின்றன.

ராஜபக்சவினர் ஆட்சிக்காலத்தில் சுதந்திரமாக பேசக் கூட முடியாமல் இருந்ததாகவும் மீண்டும் சர்வாதிகாரத்தில் திளைத்த அந்த குடும்ப ஆட்சியை சுதந்திரக் கட்சிக்குள் கொண்டு வந்தால், நடைபெற்று வரும் புதிய அரசியல் மறுசீரமைப்பும் அழிந்து போகும் எனவும் அவர்கள் கூறியுள்ளனர்.

யாரேனும் மகிந்த ராஜபக்சவுக்கு மீண்டும் ஸ்ரீலங்கா சுதந்திரக் கட்சிக்குள் நுழைய கதவை திறந்து கொடுக்க முயற்சித்தாலும் ஜனாதிபதி மைத்திரிபால சிறிசேன அதற்கு எந்த வகையிலும் இடமளிக்க மாட்டார் என ஜனாதிபதிக்கு நெருக்கமான வட்டாரங்கள் தெரிவித்துள்ளன.