வாக்காளா்களுக்கு விநியோகிக்கப்படவிருந்த 795 மதுபான போத்தல்களுடன் 4பேர் கைது

மலையக வாக்காளர்களுக்கு விநியோகிக்க மதுபான போத்தல்களை சட்ட விரோதமாக கொண்டு சென்ற 4 பேர் நேற்று ஹற்றன் பொலிஸாரால் கைது செய்யப்பட்டுள்ளனர்.
நேற்று இரவு 7.30 மணியளவில் ஹட்டன் மல்லியப்பு சந்தியில் வைத்து பொலிஸாரால் சந்தேக நபர்கள் கைது செய்யப்பட்டுள்ளனர்.

ஹற்றன் பொலிஸாருக்கு கிடைத்த தகவலின் படியே விரைந்து சென்று, லொறியை சுற்றிவளைத்து விசாரணை மேற்கொள்ளும் போது இவ்வாறு மதுபான போத்தல்கள் கொண்டு செல்கின்றமை தெரியவந்துள்ளது.

இதனையடுத்து லொறியில் பயணித்த நால்வரையும் கைது செய்துள்ளனர். இதில் பெண் ஒருவரும் அடங்குகின்றமை குறிப்பிடத்தக்கது.

தலவாக்கலையிலிருந்து மஸ்கெலியா, கினிகத்தேனை ஆகிய பகுதிகளுக்கு லொறியில் 795 மதுபான போத்தல்கள் கொண்டு சென்றதாக ஹற்றன் பொலிஸார் தெரிவித்தனர். இதன் பெறுமதி 8 இலட்சம் ரூபா என ஹற்றன் பொலிஸார் தெரிவிக்கின்றனர்.

லொறியையும், 795 போத்தல்களையும் பொலிஸார் கைப்பற்றியுள்ளனர்.

கைது செய்த சந்தேக நபர்கள் நால்வரையும் இன்று ஹற்றன் நீதிமான் முன்னிலையில் ஆஜர்ப்படுத்த நடவடிக்கைகள் எடுக்கப்பட்டிருப்பதாக பொலிஸார் தெரிவித்தனர்.