பொதுப் பிரச்சனைகளில் தலையிடமாட்டோம் என்று அறிவிப்பதா? நடிகர் விஷாலுக்கு எதிராக போராட்டம்

பொதுப் பிரச்சனைகளில் தலையிடமாட்டோம் என்று அறிவித்த நடிகர் விஷாலுக்கு கண்டனம் தெரிவித்து வேதாரண்யத்தில் விவசாயிகள் போராட்டத்தில் ஈடுபட்டுள்ளனர்.
பொதுத்தேர்தல் போல் நடத்தப்பட்ட தென்னிந்திய நடிகர் சங்கத் தேர்தலில் தேர்வு செய்யப்பட்ட நடிகர் சங்க பொதுச் செயலாளர் விஷால், செய்தியாளர்களிடம் பேட்டியளித்துள்ளார்.

அப்போது, காவிரி நீர் போன்ற பொதுப்பிரச்சனைகளில் நடிகர் சங்கம் தலையிடாது என அவர் பதிலளித்துள்ளார்.

விஷாலின் இந்த கருத்துக்கு கண்டனம் தெரிவித்து வேதாரண்யம் தாலுக்கா, ஆயக்காரன்புலம் கடைத்தெருவில் வேதாரண்யம் வட்டார விவசாய சங்கத்தினர் கண்டன ஆர்ப்பாட்டம் நடத்தியுள்ளனர்.

அவர்கள் கூறுகையில், காவிரி நீர் பிரச்சனை போன்ற பொதுப்பிரச்சனைகள் குறித்து நடிகர் சங்கம் போராட்டம் நடத்தாது என நடிகர் விஷால் அறிவித்துள்ளதை திரும்ப பெறவேண்டும்.

இல்லையென்றால் ஒருங்கிணைந்த காவிரி டெல்டா பகுதியில் நடிகர் விஷால் படத்தை திரையிட விடமாட்டோம்.

மேலும், விஷால் மன்னிப்பு கேட்காவிட்டால் தமிழ்நாடு முழுவதும் விவசாயிகளை ஒன்றுதிரட்டி அவருக்கு எதிராக பல்வேறு போராட்டம் நடத்துவோம் என தெரிவித்துள்ளனர்.