இலங்கைக்கான விசேட பிரதிநிதியை நியமித்துள்ள சீனா

இலங்கையுடனான தொடர்புகளை வலுப்படுத்தும் நோக்கில் சீன அரசாங்கம் இலங்கைக்கான விசேட பிரதிநிதி ஒருவரை நியமித்துள்ளது.
ஐக்கிய நாடுகள் சபையில் சீனாவின் பிரதிநிதியாக கடமையாற்றிய சீனாவின் உப அமைச்சரான லியூ.ஷென்மின் என்பவரே இலங்கைக்கான விசேட பிரதிநிதியாக நியமிக்கப்பட்டுள்ளார்.

இலங்கையில் செயற்படுத்தப்படும் சீனாவின் முதலீடுகள் சம்பந்தமாக இந்த பிரதிநிதி இலங்கையின் புதிய அரசாங்கத்துடன் தகவல்களை பரிமாறிக்கொள்ள நடவடிக்கை எடுப்பார் என சவுத் சைனா மோர்னிங் போஸ்ட் என்ற சீன பத்திரிகை தெரிவித்துள்ளது.

இலங்கையில் கடந்த ஆறு வருடங்களில் மேற்கொள்ளப்பட்ட உட்கட்டமைப்பு வசதிகள் தொடர்பான அபிவிருத்தித் திட்டங்களில் 70 வீதமான முதலீடுகளை சீனாவே செய்திருந்தது.

இந்த நிலையில், புதிதாக நியமிக்கப்பட்டுள்ள சீனாவின் விசேட பிரதிநிதி நேற்று ஜனாதிபதி மைத்திரிபால சிறிசேனவை கொழும்பில் சந்தித்தார்.