தகவல் அறியும் உரிமைச்சட்டம் ஒக்டோபரில் நிறைவேற்றப்படும்! ஊடக அமைச்சர் கயந்த கருணாதிலக்க

by oviya Wed Sep 23, 2015 1:34 pm

எதிர்வரும் ஒக்டோபர் மாதத்திற்குள் தகவல் அறியும் உரிமைச்சட்டம் நடைமுறைக்கு கொண்டு வரப்படும் என்று தகவல், ஊடகத்துறை அமைச்சர் கயந்த கருணாதிலக்க தெரிவித்துள்ளார்.
இன்று நடைபெற்ற அமைச்சரவை முடிவுகள் தொடர்பான ஊடகவியலாளர் சந்திப்பின்போது அவர் இதனைத் தெரிவித்துள்ளார்.

தொடர்ந்தும் கருத்து வெளியிட்டுள்ள அமைச்சர் கயந்த கருணாதிலக்க,எதிர்வரும் ஒக்டோபர் ஐந்தாம் திகதி தகவல் அறியும் உரிமைச்சட்டமூலத்தின் வரைபு சட்டமா அதிபரிடம் கையளிக்கப்படவுள்ளது. அதனைத் தொடர்ந்து ஒக்டோபர் 07ம் திகதி இந்த சட்டமூலம் அமைச்சரவைக்கு சமர்ப்பிக்கப்படவுள்ளது.

தகவல் அறியும் உரிமை தொடர்பான சட்டமூலம் தொடர்பாக மாகாண சபைகளின் கருத்துக்களும் கேட்டறியப்படவுள்ளது.

அதனைத் தொடர்ந்து அக்டோபர் மாத நடுப்பகுதியில் நாடாளுமன்றத்தின் அனுமதியைப் பெற்றுக்கொள்வதற்கும் திட்டமிடப்பட்டுள்ளது.

இதன் மூலம் ஒக்டோபர் இறுதிக்குள் தகவல் அறியும் உரிமை தொடர்பான சட்டமூலம் நடைமுறைக்கு வந்துவிடும் என்றும் அமைச்சர் கயந்த கருணாதிலக்க தெரிவித்துள்ளார்.