அணி சாராதவன் என்பதால் அனுராதபுரம் கூட்டத்தில் பங்கேற்கவில்லை!– அமைச்சர் துமிந்த

மைத்திரி அல்லது மகிந்த அணியின் உறுப்பினர் இல்லை என்ற காரணத்தினாலேயே தாம் அனுராதபுரத்தில் நடைபெற்ற ஐக்கிய மக்கள் சுதந்திர முன்னணியின் முதலாவது தேர்தல் பிரசாரக் கூட்டத்தில் பங்கேற்கவில்லை என அமைச்சர் துமிந்த திஸாநாயக்க தெரிவித்துள்ளார்.
ஐக்கிய மக்கள் சுதந்திர முன்னணியின் தேர்தல் பணிகள் சம்பந்தமாக அனுராதபுரம் ஸ்ரீலங்கா சுதந்திரக் கட்சியின் அலுவலகத்தில் நேற்று நடைபெற்ற கூட்டத்தில் உரையாற்றும் போதே அவர் இதனை கூறியுள்ளார்.

நான் எந்த அணியையும் பிரதிநிதித்துவப்படுத்துவதில்லை. அத்துடன் வேறு ஒரு நபருக்காக குரல் கொடுப்பதுமில்லை. ஸ்ரீலங்கா சுதந்திரக் கட்சியையே நான் பிரதிநிதித்துவப்படுத்துகிறேன்.

இதன் காரணமாக அனுராதபுரத்தில் நடைபெற்ற கூட்டத்தில் கலந்து கொள்ளவில்லை என துமிந்த திஸாநாயக்க குறிப்பிட்டுள்ளார்.

பொது வேட்பாளராக போட்டியிடும் நோக்கில் மைத்திரிபால சிறிசேன, மகிந்த ராஜபக்ச அரசாங்கத்தில் இருந்த வெளியேறிய போது, அவருடன் இணைந்து அரசாங்கத்தில் இருந்த வெளியேறிவர்களில் துமிந்த திஸாநாயக்கவும் ஒருவர் என்பது குறிப்பிடத்தக்கது.