பத்திரிக்கையாளர் உயிருடன் எரித்துக் கொலை! அமைச்சர் உட்பட பொலிசார் மீது வழக்குப்பதிவு

உத்திரபிரதேசத்தில் அமைச்சருக்கு எதிராக கருத்து தெரிவித்த பத்திரிக்கையாளர் ஒருவர் உயிரோடு எரித்து கொல்லப்பட்ட சம்பவம் பெரும் அதிர்ச்சியை ஏற்படுத்தியுள்ளது.
சமாஜ்வாதி கட்சியைச் சேர்ந்த அமைச்சர் ராமமூர்த்தி வர்மாவுக்கு எதிராக ஷாஜகான்பூரை சேர்ந்த ஜெகேந்திரசிங் என்ற பத்திரிக்கையாளர் தனது முகநூலில் கருத்து தெரிவித்துள்ளார்.

மேலும், அவரது கனிமக்கொள்ளை, நில அபகரிப்பு உள்ளிட்ட சட்ட விரோத நடவடிக்கைகள் பற்றி கெஜேந்திரசிங் பத்திரிக்கைகளிலும், முகநூல்களிலும் எழுதி வந்ததாக கூறப்படுகிறது.

இதனால் ஆத்திரமடைந்த அமைச்சர் ராமமூர்த்தி பத்திரிகையாளர் ஜெகேந்திரசிங்கை காவல் துறையினரின் உதவியுடன் உயிரோடு எரித்து கொன்றதாக அவரது குடும்பத்தினர் புகார் தெரிவித்துள்ளனர்.

அதுமட்டுமல்லாமல் அந்த சம்பவத்தை நேரில் பார்த்த சாட்சியங்களும் அதை உறுதிபடுத்தியுள்ளனர்.

ஆனால் இந்த குற்றச்சாட்டை பொலிசார் மறுத்துள்ள நிலையில், இது குறித்து விசாரணை நடத்திய ஷாஜகான்பூர் பொலிசார், அமைச்சர் ராமமூர்த்தி வர்மா உள்ளிட்ட 6 பேர் மீது தற்போது வழக்கு பதிவு செய்துள்ளனர்.