லட்டுக்காக ஆண் காவலருடன் கட்டி புரண்டு சண்டையிட்ட பெண் காவலரால் பரபரப்பு

விழுப்புரத்தில் லட்டுக்காக பெண் காவலரும், ஆண் காவலரும் கட்டி புரண்டு சண்டை போட்ட சம்பவம் பரபரப்பை ஏற்படுத்தியுள்ளது.
விழுப்புரம் தாலுக்கா காவல்நிலையத்தில் தலைமைக்காவலராக உள்ள ராஜேஸ்வரி, காவல்நிலையத்திற்கு அருகில் புதிதாக கட்டப்படும் ஒரு கட்டடத்தின் அடிக்கல் பூஜைக்கு சென்றுள்ளார். அங்கு அவருக்கு அட்டைபெட்டியில் லட்டு வழங்கப்பட்டுள்ளது.

லட்டை எடுத்துக்கொண்டு வந்து தன் மேஜை மீது வைத்துவிட்டு ராஜேஸ்வரி பணியை கவனிக்க சென்றுவிட்டார்.

வேலையை முடித்துவிட்டு மீண்டும் தன் இருக்கைக்கு வந்த ராஜேஸ்வரி, மேஜை மீது வைக்கப்பட்ட லட்டு காணாமல் போனதால் அதிர்ச்சியடைந்துள்ளார்.

சக பொலிசாரிடம் விசாரித்த போது, அதே காவல்நிலையத்தில் சிறப்பு உதவி ஆய்வாளராக பணியாற்றும் சின்னப்பன் என்பவர் லட்டுகளை சாப்பிட்டது தெரியவந்துள்ளது.

தன்னை கேட்காமல் லட்டுகளை சாப்பிட்ட சின்னப்பனை சக ராஜேஸ்வரி ஒருமையில் திட்டியுள்ளார்.

இதனால் ஆத்திரமடைந்த சின்னப்பன், ராஜேஸ்வரியின் கன்னத்தில் அறைந்துள்ளார்.

இதனையடுத்து கை கலப்பாகி இருவரும் காவல்நிலையத்திலேயே கட்டி புரண்டு சண்டை போட்டுள்ளனர்.

மேலும், இந்த சண்டையை தடுக்க முடியாத பொலிசார், மாவட்ட காவல்துறை கண்காணிப்பாளருக்கு தகவல் தெரிவித்ததையடுத்து, அவர் நேரில் அழைத்து விசாரணை நடத்தி, சமாதானப்படுத்தியுள்ளார்.