விவசாயியை மணமுடித்து புரட்சி செய்த பெண் அமைச்சர்: குவியும் பாராட்டு!

கேரளாவின் ஒரே பெண் அமைச்சரான ஜெயலட்சுமி என்பவர் விவசாயி ஒருவரை திருமணம் புரிந்துள்ளார்.
கேரளாவில் உம்மண்சாண்டி தலைமையில் நடைபெறும் காங்கிரஸ் கூட்டணி அரசில் பிற்படுத்தப்பட்டோர் மற்றும் இளைஞர் நலத்துறை அமைச்சராக உள்ளார் ஜெயலட்சுமி.

இந்நிலையில், ஆதிவாசிகள் இனத்தை சேர்ந்த ஜெயலட்சுமிக்கும் வயநாடு மாவட்டம் கம்பளக்காடு பகுதியை சேர்ந்த அனில்குமார் என்ற விவசாயிக்கும் திருமணம் நிச்சயிக்கப்பட்டுள்ளது.

இதையடுத்து வயநாடு அருகே உள்ள அமைச்சரின் வீட்டில் நேற்று எளிய முறையில் திருமணம் நடைபெற்றுள்ளது.

ஆதிவாசிகள் முறைப்படி நடந்த இந்த திருமணத்தில் மணமகன் அனில் குமார், மணமகள் ஜெயலட்சுமி கழுத்தில் இந்து முறைப்படி தாலி கட்டியுள்ளார்.

திருமணத்திற்கு விருந்தினர்களாக பங்கேற்ற கேரள முதலமைச்சர் உம்மண்சாண்டி, எதிர்கட்சித் தலைவர் அச்சுதானந்தன் ஆகியோரின் கால்களில் விழுந்து மணமக்கள் ஆசி பெற்றுள்ளனர்.

மேலும், ஜெயலட்சுமியின் திருமணத்தை முன்னிட்டு அவர் எம்.எல்.ஏவாக உள்ள மானந்தவாடி தொகுதிக்கு பல்வேறு நலத்திட்டங்களை அமைச்சர்கள் திருமணப் பரிசாக அறிவித்துள்ளது குறிப்பிடத்தக்கது.