பம்பலப்பிட்டி பாடசாலையில் பெண் படுகொலை! சந்தேகத்தின் பேரில் இருவர் கைது

பிரபல ஆண்கள் பாடசாலையொன்றின் களஞ்சியசாலையில் இருந்து பெண்ணொருவரின் சடலம் கண்டுபிடிக்கப்பட்டமை தொடர்பில் சந்தேகத்தின் பேரில் இருவர் கைது செய்யப்பட்டுள்ளனர்.
குறித்த பாடசாலையின் காவலாளியும், அவரை சந்திப்பதற்கு வருகை தந்ததாக கூறப்படும் ஒருவருமே கைது செய்யப்பட்டுள்ளதாக பொலிஸார் குறிப்பிட்டனர்.

கைதான 2 சந்தேகநபர்களும் இன்று (22) புதுக்கடை நீதிமன்றத்தில் ஆஜர்படுத்தப்படவுள்ளனர்.

இதேவேளை, கொலை செய்யப்பட்டதாக கூறப்படும் பெண்ணின் சடலத்தை பொறுப்பேற்பதற்கு அவரது உறவினர்கள் மறுப்புத் தெரிவித்துள்ளனர்.

பிரேத பரிசோதனை அறிக்கையில் மரணத்திற்கான காரணம் குறிப்பிடப்படாமையால் சடலத்தை பொறுப்பேற்க உறவினர்கள் மறுத்துள்ளதாக பொலிஸ் ஊடகப் பேச்சாளரும், உதவிப் பொலிஸ் அத்தியட்சகருமான ருவன் குணசேகர கூறினார்.

பம்பலப்பிட்டியிலுள்ள பிரபல பாடசாலையொன்றின் களஞ்சியசாலையில் இருந்து பெண்ணொருவரின் சடலம் கடந்த ஞாயிற்றுக்கிழமை கண்டுபிடிக்கப்பட்டிருந்தது.

பாடசாலையின் பெண் சிற்றூழியர் ஒருவரே இவ்வாறு சடலமாக கண்டுபிடிக்கப்பட்டிருந்தார்.

குறித்த பெண் பாலியல் துஷ்பிரயோகத்திற்கு உட்படுத்திய பின்னர் கொலை செய்யப்பட்டுள்ளதாக ஆரம்ப கட்ட விசாரணைகள் மூலம் தெரிய வந்துள்ளது.

கொலை செய்யப்பட்ட பெண்ணின் சடலம் நிர்வாண நிலையில் மீட்கப்பட்டிருந்தமை குறிப்பிடத்தக்கது.