நூலாக உருவெடுக்கும் ராஜபக்சக்களின் ஊழல்

முன்னாள் ஜனாதிபதி மகிந்த ராஜபக்ச, அவரது குடும்பத்தினர் மற்றும் அவரின் ஆதரவாளர்களின் ஊழல்களை புத்தக வடிவில் வெளியிட தீர்மானிக்கப்பட்டுள்ளது.
ஊழல் மோசடிகளுக்கு எதிராக குரல் கொடுக்கும் அமைப்பின் அழைப்பாளர் வசந்த சமரசிங்க இது தொடர்பிலான தகவல்களை வெளியிட்டுள்ளார்.

ஊழல் மோசடிகளுக்கு எதிரான குரல் அமைப்பிற்கு சமீப காலமாக கிடைக்க பெற்று வரும் முறைப்பாடுகள் மற்றும் சாட்சியங்களின் அடிப்படையிலேயே இந் நூல் வெளியிடப்படவுள்ளதாக அவர் குறிப்பிட்டுள்ளார்.

இலஞ்ச ஊழல் ஆணைக்குழு, குற்றவியல் விசாரணை பிரிவு உள்ளிட்ட பல்வேறு தரப்பினருக்கு இந்த ஆவணங்களின் பிரதிகளை அனுப்பி வைப்பதற்கும் தீர்மானிக்கப்பட்டுள்ளது.

பொது மக்களின் பணத்தை சூறையாடி மோசடியான முறையில் பயன்படுத்திய நபர்கள் குறித்து நம் சமூகத்தினரை தெளிவுபடுத்தும் நோக்கிலேயே இந்நூல் வெளியிடப்படவுள்ளது என அவர் சுட்டிக்காட்டியுள்ளார்.