ஊழல் மோசடிக்காரர்கள் பாதுகாக்கப்படமாட்டார்கள்: அர்ஜூன

ஊழல் மோசடிகளில் ஈடுபட்டவர்கள் பாதுகாக்கப்படமாட்டார்கள் என துறைமுக மற்றும் விமான சேவைகள் அமைச்சர் அர்ஜூன ரணதுங்க தெரிவித்துள்ளார்.
வெயாங்கொடயில் நேற்று இடம்பெற்ற நிகழ்வொன்றில் கலந்து கொண்டு உரையாற்றிய போதே அவர் இதனை தெரிவித்துள்ளார்.

முன்னாள், இன்னாள் ஜனாதிபதிகளுக்கிடையில் எவ்வாறான பேச்சுவார்த்தைகள் நடத்தப்படினும் ஊழல் மோசடிகளில் ஈடுபட்டவர்கள் பாதுகாக்கப்படமாட்டார்கள்.

முன்னாள் ஜனாதிபதிக்கும் தற்போதைய ஜனாதிபதிக்கும் இடையில் இடம்பெற்ற சந்திப்பின் போது என்ன பேசப்பட்டது என என்னிடம் பலர் கேள்வி எழுப்புகின்றார்கள்.

நான் இந்தப் பேச்சுவார்த்தைகளில் பங்கேற்கவில்லை.

எனினும் ஜனாதிபதி மைத்திரிபாலவை சந்தித்த போது ஊழல் மோசடிகளில் ஈடுபட்டவர்களை பாதுகாக்க எவ்வாறான நிபந்தனைகளை விதித்தாலும் அதனை ஏற்றுக்கொள்ளப்போவதில்லை என ஜனாதிபதி கூறினார் என அர்ஜூன ரணதுங்க தெரிவித்துள்ளார்.