நல்லாட்சியின் வருகையால் மக்களுக்கு இன்னல்கள் இல்லாத புதுவருடம்: ரணில்

பல வருடங்களின் பின் மக்களுக்கு இன்னல்கள் இல்லாத புதுவருடம் கொண்டாடுவதற்கான சந்தர்ப்பம் கிட்டியுள்ளதாக பிரதமர் ரணில் விக்ரமசிங்க தெரிவித்துள்ளார்.
எல்பிட்டியவில் நேற்று இடம்பெற்ற நிகழ்வொன்றில் கலந்து கொண்டு கருத்து தெரிவிக்கும் போதே அவர் இவ்வாறு குறிப்பிட்டுள்ளார்.

தற்போதைய அரசாங்கத்தின் ஆட்சிக் காலத்தில் மக்களின் வாழ்க்கைச் செலவு குறைவடைந்துள்ளதாக பிரதமர் ரணில் விக்ரமசிங்க சுட்டிக்காட்டியுள்ளார்.

தொழிலாளர் வர்க்கத்தினர் வறுமைக்கோட்டின் கீழ் வாழ்ந்து வருவதன் பலனாக நுகர்வோரினால் முன்வைக்கப்பட்ட கோரிக்கை வருடா வருடம் குறைந்து போனது.

கையில் பணம் இல்லாத காரணங்களினால் கடன்பட்டே கடந்த காலங்களில் புதுவருடம் கொண்டாடினார்கள்.

அத்துடன் கடந்த அரசாங்கத்தினால் பணம் கடனாக அயல் நாடுகளில் பெற்றுக்கொண்டதற்கு அதனை மக்களுக்கு வழங்கவில்லை. அப்பணத்தை அபிவிருத்தி திட்டங்களுக்கு மாத்திரமே செலவு செய்துள்ளார்கள்.

சுமார் ஆறு வருடங்களின் பின் முதல் முறையாக கடந்த மார்ச் மாதமே நாட்டில் வாழ்க்கைச் செலவு குறைவடைந்துள்ளதாக பிரதமர் ரணில் விக்ரமசிங்க மேலும் குறிப்பிட்டுள்ளார்.