வர்ண மீன் பிடிக்கும் மீன்வாடி தீக்கிரை: இயந்திரங்களுக்கும் சேதம்

மட்டக்களப்பு, காத்தான்குடி பொலிஸ் பிரிவிற்குட்பட்ட அன்வர் கடற்கரையோரத்தில் அமைக்கப்பட்டிருந்த வர்ணமீன் பிடிக்கும் மீன்வாடி இனந்தெரியாதோரினால் தீக்கிரையாக்கப்பட்டுள்ளதுடன், பெருமளவு இயந்திரங்களும் சேதமடைந்துள்ளன.
இந்த சம்பவம் இன்று இடம்பெற்றுள்ளதாக காத்தான்குடி பொலிஸார் தெரிவித்துள்ளனர்.

மீன்வாடி தீக்கிரையாக்கப்பட்டமையினால் அதனுள்ளிருந்த பல பெறுமதி மிக்க உள்ளிட்ட பொருட்கள் கருகியுள்ளன என முறைப்பாடு பதிவு செய்யப்பட்டுள்ளதாக பொலிஸார் குறிப்பிட்டுள்ளனர்.

காலி, மாத்தறை உள்ளிட்ட பல வெளிமாவட்டங்களிலிருந்து வந்து வர்ணமீன்களை பிடித்து குறித்த வாடியில் வைத்து ஒட்சிசன் ஏற்றுவதுடன் அதற்கு பயன்படுத்தப்படும் பெறுமதியான உபகரணங்களையும் இவ்வாடியில் வைத்துள்ளனர்.

வெளி மாவட்ட மீனவர்கள் வருவதை விரும்பாதவர்களே இதனை செய்திருக்கலாம் என மீன்வாடி உரிமையாளர் சந்தேகம் வெளியிட்டுள்ளார்.

இது தொடர்பான மேலதிக விசாரணைகளை காத்தான்குடி பொலிஸார் மேற்கொண்டு வருவதுடன், குறித்த வாடி கடந்த 25 வருடங்களாக செயற்பட்டு வருகின்றமை குறிப்பிடத்தக்கது.