மகிந்தவை அரசியலுக்கு அழைத்து வந்தால் வெற்றி பெற முடியாது: ராஜித்த சேனாரத்ன

முன்னாள் ஜனாதிபதி மகிந்த ராஜபக்சவை மீண்டும் அரசியலுக்கு அழைத்து வந்தால் ஸ்ரீலங்கா சுதந்திர கட்சியை தேர்தலில் வெற்றி பெற செய்ய முடியாதென சுகாதார அமைச்சர் ராஜித்த சேனாரத்ன தெரிவித்துள்ளார்.
நேற்று இடம் பெற்ற ஊடகவியலாளர் சந்திப்பில் கலந்துகொண்டு கருத்து தெரிவிக்கும் போது இவ்வாறு குறிப்பிட்டுள்ளார்.

ஐக்கிய மக்கள் சுதந்திர முன்னணியுடன் உள்ள சிறிய கட்சிகள் முன்னாள் ஜனாதிபதி மகிந்த ராஜபக்சவுடன் மனமுறிவுடன் இருக்கும் பட்சத்தில் மகிந்த ராஜபக்சவை மீண்டும் அரசியலுக்கு அழைத்து வருவது மூலம் ஸ்ரீலங்கா சுதந்திர கட்சிக்கு எதிர்காலம் ஒன்று உருவாக போவதில்லை என அவர் கூறியுள்ளார்.

இலங்கையில் இம்முறை 18 லட்ச இளைஞர்கள் தேர்தலில் வாக்களிக்க தகுதி பெற்றுள்ள நிலையில், அவர்கள் மூலம் பெரும்பான்மை வாக்குகள் ஜனாதிபதி மைத்திரிபால சிறிசேனவிற்கே கிடைக்கும் எனவும் சிறிய கட்சிகள் மூலம் சிறுபான்மையுடைய வாக்குகளே முன்னாள் ஜனாதிபதி மகிந்த ராஜபக்சவிற்கு கிடைக்கும் இதனால் வெற்றிக்கு பாதிப்பேற்படுமென குறிப்பிட்டுள்ளார்.

மகிந்த மீண்டும் வந்தால் சுதந்திரக்கட்சி தோல்வியடையும்: முன்னாள் பிரதமர்

முன்னாள் ஜனாதிபதி மகிந்த ராஜபக்ச எதிர்வரும் பொதுத் தேர்தலில் போட்டியிட்டால், கட்டாயம் ஸ்ரீலங்கா சுதந்திரக் கட்சி பிளவுப்படும் எனவும் அது கட்சியின் தோல்விக்கும் காரணமாக அமையும் எனவும் முன்னாள் பிரதமரும் சுதந்திர கட்சியின் சிரேஷ்ட உறுப்பினருமான ரட்ணசிறி விக்ரமநாயக்க தெரிவித்துள்ளார்.

வாராந்த பத்திரிகை ஒன்றுக்கு வழங்கிய நேர்காணலில் அவர் இதனை கூறியுள்ளார். அவர் மேலும் தெரிவிக்கையில்,

தலைவர்கள் கூறுவதால், ஸ்ரீலங்கா சுதந்திரக் கட்சி எதிர்க்கட்சி ஆகிவிடாது. தற்போது அப்படி எதுவுமில்லை. ஸ்ரீலங்கா சுதந்திரக் கட்சியும் தற்போது ஆளும் கட்சியில் உள்ளது. மகிந்த ராஜபக்சவை பிரதமராக்க வேண்டும் என்று வலியுறுத்தும் கூட்டங்களில் நான் கலந்து கொள்ள போவதில்லை.

மக்கள் அது சம்பந்தமான தீர்ப்பு ஒன்றை வழங்கியுள்ளனர். மக்களின் அந்த தீர்ப்புக்கு நான் தலை வணங்குகிறேன். மகிந்த பிரதமர் வேட்பாளராக போட்டியிட வேண்டுமாயின் அங்கீகரிக்கப்பட்ட முறைகள் உள்ளன. முதலில் அவர் கட்சியில் வேட்புமனுவை பெற்றுக்கொள்ள வேண்டும்.

அதன் பின்னரே தேர்தலில் போட்டியிட வேண்டும். கட்சியின் ஊடாக வேட்புமனுவை பெற்றுக்கொண்டு வந்தால், மகிந்தவை பிரதமர் வேட்பாளராக போட்டியிட வைப்பது பற்றி ஆராய்ந்து பார்க்கலாம் எனவும் விக்ரமநாயக்க குறிப்பிட்டுள்ளார்.