கொழும்பு துறைமுக நகரத் திட்ட முடிவுகள்: வெளிநாட்டு முதலீட்டிற்கு பாதிப்பில்லை

கொழும்பு துறைமுக நகரத் திட்டம் தொடர்பாக அரசாங்கம் எடுக்கும் தீர்மானத்தினால் வெளிநாட்டு முதலீடு எவ்வகையிலும் பாதிக்காது என முதலீட்டு ஊக்குவிப்பு பிரதியமைச்சர் எரான் விக்ரமரட்ன தெரிவித்துள்ளார்.
ஆங்கில ஊடகமொன்றிற்கு வழங்கிய செவ்வியிலேயே அவர் இவ்வாறு குறிப்பிட்டுள்ளார்.

துறைமுக திட்டம் தொடர்பில் ஆராய்வதற்காக அமைச்சரவை உபகுழுவிற்கு அப்பால் நிபுணர் குழுவொன்றும் நியமிக்கப்பட்டுள்ளது.

இந்நிலையிலேயே கொழும்பு துறைமுக நகரத் திட்ட தீர்மானங்களினால் வெளிநாட்டு முதலீட்டில் பாதிப்பு ஏற்படாது என பல நிபணர்கள் தெரிவித்துள்ளதாக பிரதியமைச்சர் சுட்டிக்காட்டியுள்ளார்.

துறைமுக நகரத் திட்டம் குறித்து இறுதி முடிவெடுப்பது இலகுவானதல்ல, அது மிகவும் குழப்பத்தை ஏற்படுத்த கூடிய விடயமாகும்.

பல ஆவணங்களை ஆய்வு செய்ததன் பின்னரே துறைமுக திட்டம் குறித்து இறுதி முடிவு எடுக்க முடியும் என பிரதியமைச்சர் குறிப்பிட்டுள்ளார்.

மேலும் கொழும்பு துறைமுக நகரத் திட்டம் குறித்து இறுதி முடிவெடுக்கப்படும் நாள் குறித்து தெரிவிக்க முடியாது எனவும் எரான் விக்ரமரட்ன தெரிவித்துள்ளார்.